Монгол Улсын Ерөнхий сайд Л.Оюун-Эрдэнэ Америкийн нэгдсэн улсын дэд ерөнхийлөгч Камала Харрисын урилгаар Америкийн нэгдсэн улсад энэ сарын 2-6-ны өдрүүдэд албан ёсны айлчлал хийхээр өчигдөр эх орноосоо мордсон. Тэгвэл энэхүү айлчлал өнөөдрөөс албан ёсоор эхэлж байна.
Өнөөдөр тэрбээр АНУ-ын Дэд ерөнхийлөгч К.Харристай албан ёсны хэлэлцээ хийж, АНУ-ын Засаг захиргааны өндөр албан тушаалтнуудтай уулзах хөтөлбөртэй билээ. Мөн АНУ-ын Сансар судлал ба сансрын удирдлагын газар, АНУ-ын Олон улсын хөгжлийн агентлаг, АНУ-ын Олон улсын хөгжлийн санхүүжилтын корпорацид тус тус зочлохоор төлөвлөж буй.
Айлчлалын үеэр Ерөнхий сайд Л.Оюун-Эрдэнэ Монгол Улсын “Гуравдагч хөрш”-ийн бодлогод чухал байр суурь эзэлдэг Америкийн нэгдсэн улстай хөгжүүлж буй Стратегийн түншлэлийн харилцааг гүнзгийрүүлэх, улс төр, эдийн засаг, хүмүүнлэг, бүс нутгийн хамтын ажиллагааг өргөжүүлэх асуудлуудаар санал солилцоно. Мөн хоёр талын хамтын ажиллагааны баримт бичгүүдийг байгуулахаар төлөвлөжээ.
Ерөнхий сайдын АНУ-д хийх энэ удаагийн албан айлчлалын бүрэлдэхүүнд Зам, тээврийн хөгжлийн сайд С.Бямбацогт, Сангийн сайд Б.Жавхлан нарын Засгийн газрын гишүүд болон хэвлэл мэдээллийнхэн зэрэг холбогдох албаны хүмүүс багтжээ.
Айлчлалын хүрээнд олон нийтийн анхаарлыг хамгийн их татаж байгаа асуудал бол Монгол-АНУ хооронд шууд нислэгтэй болох явдал юм. Энэ талаар Зам, тээврийн хөгжлийн сайд С.Бямбацогт “Тус айлчлалын үеэр хорин жил хүлээгдсэн Монгол Америкийн хооронд шууд нислэгтэй болох асуудал эцэслэн шийдвэрлэгдэнэ. Өөрөөр хэлбэл Агаарын тээврийн тухай Монгол улсын Засгийн газар, Америкийн нэгдсэн улсын засгийн газар хоорондын хэлэлцээр байгуулагдана. Цар тахлын өмнөх агаарын тээврийн оргил үе болох 2019 онд Монгол Улс АНУ хооронд 58 мянга шахам зорчигч зорчсон байдаг. Энэ нь БНСУ, БНХАУ, Япон улсын чиглэлийн дараа орох томоохон зорчигч урсгал тэнд буйг харуулж байгаа хэрэг. Өнөөдөр манай улсын 50 шахам мянган иргэн АНУ-ын 200 гаруй хотод ажиллаж, амьдарч, суралцаж байна. OPEN SKY хэлэлцээр байгуулагдсанаар манай дотоодын агаарын тээвэрлэгчид тус улс руу шууд нислэг гүйцэтгэх боломж бүрдэх юм. Ингэснээр манай иргэд АНУ руу хямд зорчих, олон улс руу гарч буй 45 сая ам.долларын мөнгөн урсгалыг дотооддоо авч үлдэх, үндэсний агаарын тээвэрлэгчдийн маань өрсөлдөх чадвар нэмэгдэх бололцоо бий болно гэсэн үг. Зөвхөн эдийн засгийн агуулгын хувьд төдийгүй улс төрийн ач холбогдлоороо ч түүхэн үйл явдал болно гэж харж байна. Гадаад ертөнцөд биднийг хоёр том хөршийн дунд оршин буй ардчиллын баянбүрд гэцгээдэг. Тэгэхээр ардчилал, хүний эрх, эрх чөлөөний арал болсон манай улс энэ байдлаа хадгалан, гуравдагч хөршүүдтэйгөө харилцаа хамтын ажиллагаагаа хөгжүүлэхэд агаарын тээврийн харилцааны энэ түүхэн дэвшил гүүр болно” хэмээн манай сонинд ярилцлага өгсөн билээ.
Монгол Улсын Ерөнхий сайд Л.Оюун-Эрдэнийн АНУ-д хийж буй албан ёсны айлчлалын мэдээллийг бид үргэлжлүүлэн хүргэх болно.
