Жинхэнэ ЖДҮ-чдээс боломжийг нь хулгайлсан нэр бүхий улстөрчид, нөлөө бүхий албан тушаалтнуудын мэдээлэл одоогоос 4 жилийн өмнө буюу 2018 оны сүүлээр дуулиан шуугиан тарьж байсан билээ. Тэгвэл жинхэнэ жижгүүдийн өмнүүр орж, хоолыг нь булаасан гэх дуулианд холбогдсон нэр бүхий нөхдийн нэг болох Сангийн сайд Болдын Жавхлан өдгөө Нийгмийн даатгалын сангийн мөнгийг зувчуулсан Чингис хаан банктай холбоотой асуудалд холбогдоод буйг Ergelt.mn сайтын эрэн сурвалжлах баг олон нийтэд мэдээллээд буйг эхэнд тодотгоё.
Энэ талаар өгүүлэхээс өмнө Б.Жавхлан сайдын нэр холбогдож явсан ЖДҮ-гийн асуудлаас товч дурдахад илүүдэхгүй байх. Тэрбээр “Пример инвестмент групп”-д 900 сая, “Жетте майнинг” ХХК-д мах махан бүтээгдэхүүний үйлдвэрлэлийн төслөөр 800 сая, “Алтан олом” ХХК-д 250 сая төгрөгийн зээлийг ЖДҮХС-гаас өөрийн нөлөөллөө ашиглан, олгуулсан гэх асуудалд нэр холбогдож, хэвлэлүүд ч уг асуудлаар нь бичиж, нийтэлж байв. Харин тэрбээр дээр нэр дурдагдсан компаниудтай огт холбоогүй гэсэн байр суурийг илэрхийлж байсан билээ. Хэдий тийм ч ЖДҮ сангаас зээл авсан дээрх компаниудтай түүнийг холбох сэжмүүдийг хэвлэлүүд эрэн сурвалжилж нийтэлж л байсан. Тухайлбал, Б.Жавхлан нь “Сүхбаатар аймгийн нэгдүгээр арван жилийн сургуулийн төгсөгчдийн холбоо” гэх ТББ-ын Удирдах зөвлөлийн дарга бол тус зөвлөлд нь ЖДҮ сангаас зээл авсан “Жетте майнинг” ХХК-ийн захирал Гөлгөөгийн Эрдэнэцогт багтаж байсан байдаг. Нэг ёсондоо Б.Жавхлан сайд өөртэйгөө огт хамааралгүй, танихгүй, мэдэхгүй гэх “Жетте майнинг” ХХК-ийн захирал нь түүнтэй хамт нэг аймагт нэг сургуульд хамтдаа сурч байсан бөгөөд нэг ТТБ-д хамтдаа харьяалагдаж байсан гэсэн үг л дээ.
Тэгэхээр энэ мэдээллийг энд дурдахын учир нь Монгол Улсын төсөв, сангийн бодлогыг атгаж, бодлого, шийдвэр үзэглэхэд томоохон оролцоотой яваа улс төрч Б.Жавхлан нь нэр цэвэр нэгэн биш бөгөөд ард түмний татварын мөнгийг хадгалж өгөх нэрийдлээр төртэй үгсэн хуйвалдсан банкуудын нэг болох Чингис хаан банктай холбоотой асуудалд ч хэд хэдэн сэжмээр холбогдоод байна. Мэдээж түүний гэм буруутай эсэх нь хууль, шүүхийн байгууллагаар шалгаж, тогтоох асуудал тул түүнийг энд чичилж буруутгах гэсэнгүй. Гэхдээ үйлдэл цэвэр хүний нэр цэвэр л байдаг жишгээр аваад үзэхэд, элдэв асуудалд дарааллаад л холбогдоод байгаагаас нь үзэхэд түүний үйлдэлд хууль хяналтын байгууллага анхаарлаа хандуулахад гэмгүй болов уу.
Холбогдох мэдээллүүдээс үзэхэд, Чингис хаан банк Нийгмийн даатгалын санд 99 тэрбум төгрөгийн өртэй. Энэ өрөө төлөхгүй хэдэн жилийн нүүр үзэж буй. НДЕГ-ын дарга Д.Зоригт тус банкнаас авах авлагынхаа талаар УИХ-ын Нийгмийн бодлогын байнгын хорооны хурал дээр хэлэхдээ “Чингис хаан банк хуваарийн дагуу төлбөрөө хийж чадахгүй байна. Тиймээс төлбөрт нь зоорь авч байгаа. Зоорийг нь нийслэл ашиглахаар гурвалсан гэрээ хийсэн. Зоорь авснаар эхний ээлжинд 25 тэрбум төгрөг барагдана. Чингис хаан банкны асуудлаар Монголбанктай байнгын уулзалт зохион байгуулж байгаа. Тус банк шинэ хувьцаа эзэмшигчтэй болох асуудал яригдсан. Энэ шийдэгдвэл НДС дээр байгаа асуудлууд шийдэгдэнэ” гэсэн мэдээллийг өгсөн юм.
Гэтэл НДЕГ-ын даргын албан ёсоор хэлж ярьсан 25 тэрбумаар үнэлэгдэх зоорийн асуудал Сангийн сайд Б.Жавхлангийн эхнэр А.Соёлмаатай хэд хэдэн сэжмээр холбоотой байна гэсэн мэдээллийг Эрэн сурвалжлах сэтгүүлчид баримттай мэдээллээд байгаа юм. Тодруулбал, Б.Жавхлан сайдын эхнэр А.Соёлмаа нь Будням овогтой Батхүүгийн хамт “Ньюгоби гейт” ХХК-ийг эзэмшдэг аж. Гэтэл тус ХХК нь төрд 280 орчим тэрбум төгрөгийн өртэй Чингис хаан банктай гурван сэжмээр холбогдож буйг илчлээд байна.
Тухайлбал, Б.Жавхлан сайдын эхнэр А.Соёлмаатай хамт “Ньюгоби гейт” ХХК-ийг эзэмшигч Буднямын Батхүү нь Чингис хаан банкны 23 хувийн хувьцааг эзэмшигч Цэдэн-Иш овогтой Баярсайханы нөхөр аж. Мөн нэг сэжим нь Б.Жавхлангийн эхнэр А.Соёлмаагийн “Ньюгоби гейт” ХХК нь “Хан-Уул, 11-р хороо, С-17 тоот” хаяг дээр бүртгэлтэй байдаг. Гэтэл энэ хаяг дээр нь “ОСМ агро трейдинг” ХХК, “Органик солюшнс монголия агро” ХХК гэх хоёр компани давхар бүртгэлтэй байгаа аж. Гол нь Чингис хаан банк “ОСМ агро трейдинг” ХХК-ийг эзэмшдэг юм байна. Бүр тодруулбал, “ОСМ агро трейдинг” ХХК нь Чингис хаан банкны газар тариалан, хөдөө аж ахуй, хүнсний салбарын бизнес хариуцдаг компани аж. Түүнчлэн тус компани Сонгинохайрхан дүүрэгт 14 мянган тонн хүнсний ногоо хадгалах багтаамжтай зоорь барьж, ашиглалтад оруулсан байдаг аж. Хачирхалтай нь НДЕГ-ын зүгээс өрөндөө авахаар болсон гэх 25 тэрбум төгрөгийн үнэлгээ бүхий зоорь нь тэрхүү зоорь гэсэн мэдээллийг эрэн сурвалжлах сэтгүүлчид мэдээлж буй юм.
Тэгэхээр Монгол Улсын Сангийн яамыг удирдахаас гадна шинээр байгуулагдсан Эдийн засаг, хөгжлийн яамны асуудлыг хариуцан эрхэлж буй Болдын Жавхлан өөртэй нь нэр холбогдсон энэ асуудлаар тайлбар, мэдээлэл хийх шаардлагатай байна. Улс орны эдийн засаг гадаад, дотоод шалтгаануудын улмаас амаргүй байгаа ийм үед төрийн албыг хувь эрх ашигтаа нийцүүлэн хаших эрх хэнд ч байх ёсгүйг тодотгоё.
Эх сурвалж: Tumen.mn
