"Эм энд жи констракшн" ХХК "Aqua Garden"-ий барилгын ажлыг үргэлжлүүлсээр байна. Энэ орон сууцны хотхоныг олон нийт "Авлига хороолол" нэрээр илүүтэй мэдэх болсон.
Энэ пүрэв гарагт БХБЯ-ны Төрийн нарийн бичгийн дарга С.Магнайсүрэнгийн гарын үсэгтэй албан тоотоор "Эм энд жи констракшн"-ий барилгын зөвшөөрлийг түдгэлзүүлээд байгаа. Гэвч баасан гарагт нь барилга баригдсаар байсан юм.
Тэгвэл, хууль эрх зүйн хувьд үргэлжлүүлэн бариулах уу, эсвэл нураах уу гэдэг асуулт үүсээд байгаа "Aqua Garden" хороололд одоо ч байр зарж байна. Гэхдээ борлуулалтын албанаас бус, анх хэд хэдэн байр захиалсан хувь иргэд олноор "Хямд зарна" гэх зар байршуулжээ.
Тэдний нэгтэй утсаар ярьж үзлээ. Ингэхэд 2-4 өрөө байр байгаа аж. Хоёр өрөөний тухайд 39 м.кв, 48 м.кв, 55 м.кв гэх мэт талбайтай. Давхраасаа шалтгаалаад үнэ нь өөр. Хэрэв хоёр давхарт бол м.кв нь 3.9 сая төгрөг. Харин найман давхарт бол 4 сая 150 мянган төгрөг гэлээ.
Харин борлуулалтын албанаас нь холбогдох мэдээллийг тодруулах гэсэн боловч "Хэвлэл мэдээлэл хариуцсан хүнтэй холбож өгье, эргээд залгуулъя" гээд харилцсангүй. Уг нь "Aqua Garden" хороолол хэчнээн байрны захиалга авсныг тодруулах шаардлагатай байсан юм.
Фэйсбүүк орчинд "Aqua Garden"-д байр захиалсан хүмүүсийн нэгддэг хоёр групп байна. Нэг нь нээлттэй, 1 мянган гишүүнтэй. Нөгөө нь хаалттай бөгөөд элсэхийн тулд захиалгын гэрээний дугаар, овог нэрээ бичдэг аж. Тэр группийг албан ёсных гэцгээдэг юм байна.
Харин тэр групп харин илүү олон буюу 1.2 мянган гишүүнтэй юм байна.
Зөвхөн байр захиалсан баталгаа, нэрийг харж байж гишүүнээр элсүүлдэг групп гэж бодохоор 1.2 мянган хүн "Aqua Garden"-д хэдийнэ захиалга өгчхөөд буй гэж ойлгомоор.
Зарах тухай постууд бол олож байна. Ингэхдээ бартерын нөхцөл ярина, хямд зарна гэх мэт үгс ашигладаг аж. Доор нь сонирхож буй, мэдээлэл авахыг хүссэн хүмүүсийн сэтгэгдэл ч цөөнгүй харагдаж байна. Түүнчлэн, хувийн орон сууцны агентууд одоо ч "Aqua Garden"-аас байр хайж байгаагаа бичжээ.
"Aqua Garden"-ий хамгийн том асуудал бол Голын ай сав газар. Дунд голын дэргэд. Анх усан цогцолбор барина гэж зөвшөөрөл авсан ч орон сууц болж өөрчлөгдсөн маапаантай. Энэ нь цаашид Дундгол үеэрлэх үед усанд автахаас гадна ер Дундголын голдиролд нөлөөлж, боосон байгаа юм.
Нөгөө талаар төмөр замын дэргэд баригдсан. Төмөр зам замаас гарах тохиолдол дэлхийд цөөн биш тохиолддог, тийм учраас холбогдох эрсдэлийг үргэлж тооцож байдаг. Харин "Aqua Garden"-ий дэргэдэх төмөр зам замаас гарвал энэ хороолол руу шууд очиж мөргөх эрсдэлтэй талаар БОАЖ-ын сайд Б.Бат-Эрдэнэ мэдэгдсээр байлаа.
"Эм Энд Жи Констранкшн" ХХК-д 2022 онд ББМҮБХЗГ-ын дарга Д.Гантулга барилгын ажлын зөвшөөрөл өгсөн байдаг.
Уг нь Нийслэлийн нэхэмжлэлээр анхан шатны шүүхээр "Эм Энд Жи Констракшн" унаж, газраа алдсан байсан. Гэвч давж залдах шатны шүүхэд ялснаар газрын гэрчилгээтэйгээ үлдсэн түүхтэй.
Харин 2022 онд БХБЯ-ны газрын дарга Д.Гантулга ийн барилга барих зөвшөөрөл олгочихсон нь анхаарал татдаг. Хуучин хуулиар 16-аас дээш давхрын барилгын зөвшөөрлийг БХБЯ-наас өгдөг байсан. 2023 оны нэгдүгээр сарын 1-нээс Нийслэл олгодог болоод буй.
Анхны зөвшөөрлийг БХБЯ-наас өгсөн гэдэг утгаараа ийн яам эргээд зөвшөөрлөө түдгэлзүүлжээ. Энэ шийдвэрийг тус яамны Төрийн нарийн бичгийн дарга С.Магнайсүрэн албажуулсан билээ.
Өөрөөр хэлбэл УДШ-д хандвал энэ компани газраа алдах эрсдэлтэй. Мөн Байгаль орчны ерөнхий байцаагчийн дүгнэлт "Барилга барьж болохгүй" гэж гарвал түүнд үндэслээд нураадаг Барилгын тухай хуультай. Тийм ч учраас ирээдүй бараан. Харин асуудлыг давж гарна гэдэгт найдаж буй аятай барилгын ажлаа үргэлжлүүлж, захиалагчдын хохирлыг барагдуулах чиглэлд анхаарахгүй байна.
Олон байр зэрэг захиалсан хүмүүс ч энэ эрсдэлийг үл тоож, байраа борлуулсаар байна.
