Кремлийн хяналтанд байдаг хэвлэл, мэдээллийн хэрэгслүүдэд Оросын хүн ам зүйн хямралын талаар мэдээлэхийг хязгаарлах тушаал өгсөн гэж төрийн хоёр хэвлэл мэдээллийн эх сурвалж "The Moscow Times" сонинд мэдэгдэв.
Тэдний нэгний хэлснээр ялангуяа сүүлийн сард энэ хориг нь сүрхий хатуу болсон. Сэтгүүлчид Росстатын албан ёсны статистик мэдээг хүртэл сөрөг байдлаар мэдээлэхээ зогсоохыг шаарддаг болсон гэжээ.
2023 оны 1-р сараас 5-р сар хүртэлх хугацааны хамгийн сүүлийн үеийн мэдээгээр тус улсад төрсөн хүүхдийн тоо өмнөх оны мөн үеийнхээс 1.2%-иар буурч, 511.7 мянга болсон байна. Мөн 100,000 хүнд 8.5 төрөлт ногдож байгаа нь 1999 оноос хойшхи хамгийн доод төвшинд хүрсэн үзүүлэлт юм. Үүний уршгаар Орос улсын хүн амын тоо өнгөрсөн жил бараг 600 мянган хүнээр цөөрсөн бол сүүлийн таван жилийн хугацаанд нийтдээ 2.9 сая хүнээр буурсан байна. Зөвхөн энэ 2023 оны эхний таван сард гэхэд л 236.7 мянган хүнэээр бүл нэмэх боломжоо алджээ.
Эрүүл мэндийн яамны дарга Михаил Мурашко, ОХУ-ын Ерөнхийлөгч Владимир Путин нар 7-р сарын 12-нд уулзсаны дараахан энэ талаар хатуу чанга арга хэмжээ авахаар төлөвлөж байна.
Тухайлбал, энэ уулзалтаас долоо хоногийн дараа сайд эмэгтэйчүүдийн нийгмийн үүргийн талаар хэд хэдэн дуулиантай мэдэгдэл хийж, үр хөндөлтийг хязгаарлах, үр зулбуулах эмэнд тавих хяналтыг чангатгах нэмэлт арга хэмжээг зарлав.
Мурашко 7-р сарын 18-нд Төрийн Думд үг хэлэхдээ эмэгтэйчүүд боловсрол эзэмшиж, өөрсдөдөө материаллаг бааз бий болгож, зөвхөн үүний дараа хүүхэдтэй болохыг илүүд үзэж байгааг нь "эрүүл бус хандлага" гэж нэрлэжээ. "Тиймээс үргүйдэл, зулбах, үр шилжүүлэн суулгах гэх мэт олон асуудал үүсдэг. Гурав, дөрөв дэх хүүхэд төрөх хугацааг багасгасан. Нөхцөл байдлыг эргэн харах ёстой” гэж сайд хэлжээ.
Нэмж дурдахад, Мурашко эмнэлгийн үр хөндөлт, эмэнд тавих хяналтыг нэмэгдүүлж байгаагаа зарлав. Ийм төрлийн эмийг сэтгэцэд нөлөөлөх эмийн нэгэн адил "субъект-тоон бүртгэл"-ийн горимд шилжүүлнэ.
Үүнээс гадна, Мурашкогийн хэлснээр, Эрүүл мэндийн яам хувийн эмнэлгүүдэд үр хөндөлтийг хориглох боломжийг хэлэлцэхэд бэлэн байна. “Үр хөндөлтийг бууруулах нь бидний ажлын гол асуудал юм" гэж сайд тайлбарлав.
Росстатын мэдээлснээр, Крымийг өөртөө нэгтгэснээс хойш Орост төрөлтийн тоо тогтмол буурч, бараг гуравны нэгд хүрчээ. Тухайлбал: 2014 онд 1,942 сая, 2015 онд 1,94 сая, 2016 онд 1,888 сая, 2017 онд 1,69 сая хүн 2018 онд 1,481 сая, 2019 онд 1,436 сая, 2020 онд 1,398 сая, 2021 онд 1,398 сая, 2022 онд 1,304 сая байна.
Дайнд хэдэн арван мянган эрчүүд дайчлагдан, амь насаа алдсан нь хүн ам зүйн байдлыг зайлшгүй дордуулах болно. Хүүхдийн төрөлт дахин 5-10% -иар буурч, 19-р зууны эхэн үеэс хойшхи хамгийн бага үзүүлэлт болно гэдэгт хүн ам зүйч Алексей Ракша итгэж байна.
2023 онд ойролцоогоор 1.2 сая гаруй хүүхэд төрөх болно гэж шинжээч таамаглаж байна.
Эх сурвалж: Мoscowtimes.ru
