ЦУОШГ-ын даргын албыг түр орлон гүйцэтгэгч Л.Оюунжаргал: Долдугаар сар гарснаас хойш ихэнх нутгаар хур бороо элбэгтэй өдрүүд үргэлжилж байна. Өнөөдрөөс баруун аймгуудын нутгийн баруун өмнөд талаас эхэлж ихэнх нутгаар халах төлөвтэй байна. Өчигдрийн байдлаар Баянхонгор аймгийн Шинэжинст сумд 40 градус хүрсэн. Энэ халалт говийн аймгуудын нутгаар 5-6 хоногийн хугацаанд үргэлжлэхээр байна. Зөвхөн говийн аймгуудаар үргэлжлэхгүйгээр ихэнх нутгийг хамарна. Хур тунадасны хувьд хангай, Хөвсгөлийн нутгаар 30-ний өдөр бага зэрэг бороотой. 31-ний өдөр алтай, хангайн нутгаар түр зуурын аадар бороотой. Баруун аймагт нэлээд хуурай байгаа учир баруун аймгуудаар орох бороо бага байна. Мөн наймдугаар сарын 2-ний өдөр төв, зүүн, говийн нутгаар дуу цахилгаантай аадар бороо орно. Их халалтын дараа орж байгаа учраас усархаг бороо орох байдал бүрдчихдэг. Өөрөөр хэлбэл, наймдугаар сарын 1,2-ны өдөр орох бороо үерийн аюултай нөхцөл дагуулж болзошгүй байгаа.
Ойрын өдрүүдэд их халалтын үзэгдэлд анхаарах хэрэгтэй. Энэ халалтын үеэр Алтай, Хөвсгөлийн уулархаг нутгаар шөнөдөө 7-12 градус, өдөртөө 24-29 градус, говийн бүсийн нутгаар шөнөдөө 22-27 градус, өдөртөө 37-42 градус, Орхон, Сэлэнгийн нутгаар шөнөдөө 19-24 градус, өдөртөө 33-38 градус дулаан байхаар байна. Говийн бүс нутгаар 40-өөд градустай нэлээд хэд хоног үргэлжилнэ гэдгийг анхааруулж байна.
ХӨСҮТ-ийн халдварт өвчний тандалт судалгааны хариу арга хэмжээний нэгжийн дарга О.Сувдмаа: Манай улс эрс тэс уур амьсгалтай. Богинохон халуун дулааны улиралд гэдэсний халдварын улиралжилт болдог. Хоёрт, сая гэнэтийн үер усны аюул боллоо. Үргэлжлээд хэт халалттай холбоотойгоор иргэд хэчнээн үерийн үед гэдэсний халдварт өвчний динамик ажиглагдахгүй тайван байгаа ч гэсэн тайвширч болохгүй. Тиймээс иргэд гэдэсний халдварт өвчин, цусан суулга, хоолны хордлогод халдвараас сэргийлэх хэрэгтэй. Үүний тулд энгийн болоод мөнгө шаардахгүй олон өвчнөөс сэргийлэх боломжтой гараа зөв дарааллын дагуу савандаж угаах шаардлагатай. Үерийн дараах нөхөн сэргээлт хийгдэж байгаа тул иргэд өөрийгөө хамгаалах, бага насны хүүхдэдээ хараа хяналт сайн тавих, ямар нэг байдлаар гэдэсний халдварын зовуурийн шинж тэмдэг илэрвэл эмнэлэгт хандах, эмчээс зөв мэдээлэл авах шаардлагатай.
УОК-ын Нарийн бичгийн дарга Т.Баярхүү: Үргэлжлэн орсон бороо болон аадар борооны улмаас ОБЕГ-т нийслэлийн есөн дүүрэг, 13 аймаг, 18 сумд голын ус эргээсээ хальж, үерт автсан дуудлага мэдээлэл бүртгэгдсэн. Энэ хүрээнд орон сууц, айлын гэр, хашаа байшин, албан байгууллага, ААН-ийн оффис, машин зэрэг эд хөрөнгө үерт өртөж хохирсон байна. Он гарснаас хойш гол усны ослын 32 удаагийн тохиолдол бүртгэгдэж, 37 хүн харамсалтайгаар амь насаа алдсан байна. Үүний 25 нь том хүн, 12 нь хүүхэд. Өнөөдрийн байдлаар Төв аймгийн Борнуур сумд нэг, Дорнод аймгийн Баян-Уул сумд нэг усны осолд эрэн хайх үргэлжлүүлж байна. Гол усны осол нь ихэвчлэн анхаарал болгоомжгүй, бага насны хүүхдийг хараа хяналтгүй орхих, гол усны түвшин нэмэгдсэн үед гарцгүй гарамгүй газраар гарах, хэт машин тэрэг, техникт найдаж эрсдэлтэй нөхцөл рүү орох зэрэг шалтгаанаас үүдэлтэй гарч байна.
Тиймээс эрэг дагуу амарч зугаалахдаа аль болох эргээс хол отоглох, байрлах, бага насны хүүхдийг хараа хяналтгүй орхихгүй байхад онцгойлон анхаарах шаардлагатай байна гэлээ.
