Пхеньян Шойгу тэргүүтэй Оросын төлөөлөгчид болон Хятадын албаны хүмүүсийг урьсан байна. Тэд Пхеньянд болох Солонгосын дайн дууссаны 70 жилийн ойн арга хэмжээнд оролцох юм.
Хойд Солонгосын удирдагч Ким Чен Ун ОХУ-ын Батлан хамгаалахын сайд Сергей Шойгуд БНАСАУ-ын хамгийн сүүлийн үеийн зэвсгийг үзүүлэв. Үзэсгэлэнгийн стендээс харахад дронууд нь цэргийн ажиллагаанд оролцоход бэлэн болоогүй нь анзаарагдаж байна.
Үзэсгэлэнд тавигдсан зэвсгүүдийн дунд "Хвасон" тив хоорондын баллистик пуужин байна. Үүнийг дөрөвдүгээр сард амжилттай туршсан бөгөөд энэ нь Хойд Солонгосын хатуу түлш ашигласан тив хоородын анхны балластик пуужин юм.
Үзэсгэлэнд мөн АНУ-ын Агаарын цэргийн хүчинд ашигладаг довтолгооны үндсэн нисгэгчгүй онгоцтой төстэй хоёр шинэ загвартай дроныг үзүүлсэн гэж NK News мэдээлэв.
Оросын төрийн хэвлэлүүд ч энэ тухай ярьж байна. Гадаад төрхөөрөө дронууд Америкийн RQ-4 Global Hawk, MQ-9 Reaper загваруудтай төстэй гэж РИА Новости бичжээ. Шойгу, Ким Чен Ун нар мөн тив хоорондын баллистик пуужин, танк, хуягт тээврийн хэрэгслийг үзэж сонирхсон гэж RT мэдээлэв.
Шойгугийн айлчлал АНУ, БНАСАУ, ОХУ-ын хооронд геополитикийн хурцадмал байдал, Пхеньян Москвад Украины эсрэг дайнд ашиглах зэвсэг нийлүүлж байна гэсэн хардлага сэрдэлтийн үед болж байгаа юм.
Тодруулбал, өнгөрсөн оны намар их бууны сум, ойрын тусгалын пуужин нийлүүлэх тухай мэдээллүүд гарч байсан. Гэсэн хэдий ч Пхеньян болон Москва үүнийг эрс үгүйсгэдэг.
Гуравдугаар сард Орос улс БНАСАУ-д төлөөлөгчдөө илгээж, БНАСАУ-д хэрэгтэй хоол хүнсийг санал болгохоор төлөвлөж байгаа талаар тагнуулын мэдээлэлтэй байгаа гэж АНУ мэдэгдсэн.
Хойд Солонгост цөмийн хөтөлбөрөөс үүдэн олон улсын хатуу хориг арга хэмжээ авснаас үүдэн хүнсний хомсдолд ороод байгаа юм.
Эх сурвалж: ВВС
