Одооноос эхлэн "Цэргийн тусгай ажиллагаа"-ны бүс дэх цэргийн анги, нэгтгэлүүдэд хийх бүх айлчлалаа Батлан хамгаалахын сайд эсвэл Жанжин штабын дарга нартай ярилцаж зохицуулах ёстойг Төрийн Думын депутатуудад мэдэгдэв. Өөрөөр хэлбэл зөвхөн тэдний зөвшөөрлөөр депутатууд Тусгай ажииллагааны бүсэд очих боломжтой.
Хэвлэлийн мэдээлснээр, ОХУ-ын Батлан хамгаалахын сайд Сергей Шойгугийн Төрийн Думын дарга Вячеслав Володинд хаягласан захидлын дараа ийм шаардлагыг депутатуудын анхааралд хүргэсэн байна. Уг захидлыг өнгөрсөн долоо хоногт парламент хүлээн авсан бөгөөд "зөвлөмжийн шинж чанартай" байжээ.
Украинд дайн эхэлсний дараа Төрийн Думын хэд хэдэн депутат байлдааны бүсэд очжээ. "Ведомости" сонины эх сурвалжаас иш татан бичсэнчлэн, депутатууд удахгүй болох сонгуулийн кампанит ажилдаа "ахмад дайчдын" статусыг ашиглахын тулд "цэргийн тусгай ажиллагаа"-ын бүсэд очдог ажээ. Тухайлбал, Донбасст сайн дурын ажилтнаар очсон Хакасийн Төрийн Думын депутат Сергей Соколыг нэрлэжээ. Сокол өөрийгөө "тагнуулын ажилд" орсон гэж мэдэгджээ. 2023 онд Сокол Хакасийн амбан захирагчийн сонгуульд оролцож магадгүй байгаа юм.
Эх сурвалжлагчийн хэлснээр, депутатууд цэргүүдийн байгаа газарт зөвшөөрөлгүйгээр ирж, тэдэнтэй уулзахыг хоригложээ. Хууль тогтоогчдын "фронтын бүсэд ирж пиар хийхэд" цэргийн удирдлагууд дургүй байдаг. "Тэд фронтын бүсэд байнга зураг авч, шоу хийж байна" гэж эх сурвалжийн нэг хэлэв.
Түүнчлэн телевизийн "Можем объяснить"" сувгийн тооцоогоор Украины дайны бүсэд Оросын арван депутат нас барсан бөгөөд тэд бараг бүгдээрээ Нэгдсэн Орос намаас сонгогдсон хотын депутатууд юм.
Эх сурвалж: Svoboda.org
