С.Эрдэнэ нарын өргөн барьсан АН-ын Үндсэн дүрмийн өөрчлөлтийг Улсын дээд шүүх бүртгээд байна. Ингэснээр Х.Баттулга, Ж.Батсуурь нарын өрсөлдөж буй, нөгөө талын сонгууль хүчин төгөлдөр биш болох нөхцөл үүсээд буй.
УДШ-ИЙН ХҮЧИНТЭЙ ГЭЖ ҮЗСЭН ТАМГААР С.ЭРДЭНЭ Х.БАТТУЛГЫГ БАТЛАМЖЛАХГҮЙ
Тодруулбал, С.Эрдэнэ Үндсэн дүрмийн өөрчлөлтөө өргөн барихдаа тамга дарсан байж таарна. АН хоёр талд тамга, тэмдгийн маргаантай явсаар ирсэн. Гэтэл Улсын дээд шүүх С.Эрдэнийн дарсан тамгатай материалыг хүлээж аваад, бүртгэж байна гэдэг нэгэн логик. Өөрөөр хэлбэл Х.Баттулга, Ж.Батсуурь нарын хэн нь ч ялсан намын даргаар Улсын дээд шүүхэд батламжлагдахын тулд С.Эрдэнийн тал дахь тэр хүчинтэй даргаар тамга даруулах ёстой болно гэсэн үг. щ Харин С.Эрдэнэт ил тод илэрхийлсээр буй байр сууриараа бол Х.Баттулга дээр гүрийнэ, дарахгүй.
Х.Баттулгын хувьд яг ийм хаалт тавигдчихлаа гэдгийг түүний дэмжигчид сошиал хэлэмжээрээ илэрхийлж байна. Тэр сунгааг зохион байгуулж буй Дотоод сонгуулийн хорооны дарга И.Мөнхжаргалаас тодруулах гэсэн ч боломжгүй хариу өгсөн.
Тэгвэл, Улсын дээд шүүхийн Нийт шүүгчдийн хуралдаан өмнө нь С.Эрдэнийн өргөн барьсан Үндсэн дүрмийн өөрчлөлтийг бүртгэхгүй, буцааж байсан удаа бий. Тэр нь тун саяхан буюу энэ оны хоёрдугаар сарын 9. Тэгэхээр, тун саяхан шахуу бүртгэхгүй гэж байсан УДШ гэнэтхэн л бүртгэжээ.
Д.ГАНЗОРИГТ ҮҮССЭН ОЙЛГОМЖГҮЙ ХЭРГИЙГ ЦЭЦ ХЭЛЭЛЦЭВ
Үүнээс, Улсын дээд шүүхийн Нийт шүүгчдийн хуралдааныг даргалдаг, Ерөнхий шүүгч Д.Ганзоригийн нэр холбогдсон асуудал яах аргагүй анхаарал татна. Өнгөрсөн долоо хоногт түүнд холбогдох асуудлыг Үндсэн хуулийн цэцээр хэлэлцсэн. Улмаар Үндсэн хууль зөрчөөгүй гэж үзээд "өршөөсөн".
Үнэндээ гэнэт яагаад УДШ-ийн Ерөнхий шүүгч Д.Ганзоригт хэрэг үүсчихэв, ҮХЦ-ээр хэлэлцэхээр болов гэдэг нь анхаарал татаж байлаа.
Хэвлэлээр гарсан мэдээллүүдээр бол: Тэр өөрт нь ирсэн гомдлуудад ажлын албаараа дамжуулж хариу өгөөд 16 жил болж буй гэх. Иргэн Т-гийн гаргасан гомдлоор түүнд хэрэг үүсгэсэн нь энэ хэмээж буй. Гэтэл Т нь Д.Ганзоригийг томилогдохоос өмнө, хуучин Ерөнхий шүүгч Х.Батсүрэнгийн үед анх гомдлоо гаргаж байсан гэх. Энэ нь Д.Ганзоригийн үед маргаан болж хэлэлцэгдэж байгаа нь ихээхэн анхаарал татсан.
Улмаар Д.Ганзоригийг зориуд огцруулах оролдлого гэнэтхэн явагдаж эхэлсэн үү гэж хардах үндэслэл бий болсон. Яах ийхийн зуургүй л дэгдчихсэн, хууль зүйн үндэслэл нь ч анхаарал татмаар хөнгөн, ийм үйл явц. Түүхэндээ УДШ-ийн Ерөнхий шүүгчийн асуудал ҮХЦ-ийн Их суудлын хуралдаанаар орж буй анхны удаа энэ болсон юм.
Их суудлын хуралдаан даваа гарагт болж, түүнд үүсгэсэн хэргийг хэрэгсэхгүй болгож шийдвэрлэсэн билээ.
Үүнээс, эрх баригчид УДШ-ийн Ерөнхий шүүгчийг ийм хэлбэрээр "айлгаж" байгаад шийдвэрт нөлөөлүүлэв үү гэсэн логик гарч ирэх юм. Засаглаж буй МАН-ынхан Үндсэн хуулийн цэцэд нөлөөлдөг, тоглоомын байгууллага болгосон нь Ерөнхийлөгчийн сонгуулийн өмнө харагдаж байлаа. Тэгвэл одоо Улсын дээд шүүхийг ч мөн тийм болгож эхлэв үү гэсэн харамсал, хардлага төрж буй.
Х.Баттулга хэрэв АН-ын даргаар сонгогдох юм бол яаж ийгээд УИХ-д орж ирнэ гэсэн харизматик логикоос МАН-ынхан ихэд айж, ингэсэндээ эсрэг талынх нь тамгыг хүчинтэй гэсэн агуулгаар УДШ-ээр шийдвэр гаргууллаа л гэлтэй.
эх сурвалж:eguur.mn
