Сэтгүүлчдийн "All Eyes On Wagner" эрэн сурвалжлах төслийнхэн өнгөрсөн долоо хоногт "Беларусийн чиглэлийн ахлагч" хэмээн Евгений Пригожиний нэрлэсэн хөлсний цэргийн удирдагчийн хэн болохыг тогтоожээ. Энэ бол Украины уугуул иргэн болохыг Беларусийн "Наша Нива"-гийн сэтгүүлчид олж мэдэв.
7-р сарын 19-нд Евгений Пригожин Осиповичийн ойролцоох "Вагнер" PMC-ийн хуаранд байх үеэрээ "Пионер" хэмээн нэрлэгддэг Сергей "Беларусийн чиглэлийг ахлах" болж байна гэж мэдэгдсэн юм.
Тодруулбал, "Вагнер"-ийн хөлсний цэргийн үйл ажиллагааг хянан зохицуулж байдаг нэгэн аж. Түүний жинхэнэ нэрийг Сергей Владимирович Чубко гэдэг аж. Тэр 46 настай.
Хэвлэлийнхний хэлснээр Чубко нь Румын, Молдавтай хиллэдэг Украины Черновцы хотод цэргийн гэр бүлд төрсөн. Түүний аав Афганистанд тулалдаж байсан бөгөөд Чубко өөрөө гэрээгээр алба хааж, тэр дундаа Чеченьд байлдаж байжээ. Тэрээр 90-ээд оны эхээр эцэг эхийнхээ хамт Орос руу нүүжээ. 1994-2002 онд ОХУ-ын Агаарын цэргийн хүчинд алба хаасан.
2017 онд тэрээр Сирид тулалдаж байсан "Вагнер"-ийн хөлсний цэрэгт элсэж, дараа нь Ливид тус бүлгийн төв байрыг удирдаж байсан гэжээ.
2021 оны 7-р сард Чубко Төв Африкийн Бүгд Найрамдах Улс дахь Вагнерийн үйл ажиллагааны дарга болсон, Пригожины итгэлт хүн аж. Тэрээр бусад хөлсний цэргүүдтэй хамт Оросоос Беларусь руу ирээд байгаа нь энэ аж. Тэр одоо Беларусь дахь Вагнерийн цэргүүдийг удирдаж байна.
6-р сарын 26-нд бослогын дараа ОХУ-ын Ерөнхийлөгч Владимир Путин "Вагнер бүлэглэл"-ийн дайчдыг Батлан хамгаалах яам эсвэл бусад хууль сахиулах байгууллагуудтай гэрээ байгуулж ажиллах, гэр бүлдээ буцах, эсвэл Беларусь руу явах гурван хувилбарыг санал болгосон.
7-р сарын 19-нд Пригожин дайчдаа Беларусь улсад угтан авч, Украин дахь дайнд цаашид оролцохгүй гэж хэлжээ. Харин Беларусийн Батлан хамгаалах яам цэргийн алба хаагчдаа сургахад Вагнертай хамтран ажиллаж байгаа гэж мэдэгдээд байгаа юм.
Эх сурвалж: ВВС
