Шүүхийн ерөнхий зөвлөлөөс өнөөдөр Монгол Улсын шүүхийн 2023 оны эхний хагас жилийн шүүн таслах ажиллагааны нэгдсэн дүн мэдээг танилцууллаа.
Тус танилцуулгын үеэр нүүрсний гэх тодотголтой хэргийн талаар дараах мэдээллийг өглөө. Нийслэлийн прокурорын газраас нүүрсний гэх тодотголтой хэрэгт холбогдуулан 63 хүнд холбогдох 8 хэргийг анхан шатны шүүхэд шилжүүлжээ. Одоогийн байдлаар 33 хүнд холбогдох таван хэргийг анхан шатны шүүхээр хянан шийдвэрлэсэн бөгөөд 30 хүнд холбогдох гурван хэрэг хянан шийдвэрлэх ажиллагаанд байгаа гэв.
Тус хэрэгт холбогдуулан 37 хүнд таслан сэргийлэх арга хэмжээ авсан бол 6 хүнд тодорхой үйл ажиллагаа явуулах, албан үүргээ биелүүлэхийг түдгэлзүүлэх, 26 хүнд хязгаарлалт тогтоох, 16 хүнд цагдан хорих арга хэмжээ авчээ.
Давж заалдах шатны шүүхэд 10 хүнд холбогдох 2 хэрэг ирснээс 5 хүнд холбогдох 1 хэргийг шийдвэрлэж 5 хүнд холбогдох 1 хэрэг хянан шийдвэрлэх ажиллагаанд байна гэсэн мэдээлэл өглөө..
Мөн нүүрсний гэх хэрэгт нэр холбогдоод байсан УИХ-ын гишүүн А.Адъяасүрэн нарын төрийн өндөр албан тушаалтанд холбогдуулан шийдсэн хэрэг байхгүй гэв.
Шүүхээр ял шийтгүүлсэн 33 хүнд дийлэнхэд нь торгох болон нийтийн албанд томилогдох эрхийг хасах ял оногдуулсан байна.
