ХХААХҮ-ийн сайд асан Т.Бадамжунайн хэргийг шүүхэд шилжүүлэх саналтай прокурорт хүргүүлээд, наадмын өмнө хилийн хориг тавин суллажээ.
"Шувуу" ажиллагаагаар авчирсан Т.Бадамжунайг ямар хэрэгт холбогдуулан, хэрхэн шалгах нь маш их анхаарал татсан. Газрын наймаа, мөнгө угаах, авлига зуучлах зэрэг хэдэн бүлэг ерөнхий хэргийн хүрээнд хүмүүс ой санамждаа тулгурлан төсөөлж байв.
Тэгвэл, түүнийг албан тушаалын байдлаа урвуулан ашиглаж бусдаас хахууль авсан, мөн "Эрдэнэт үйлдвэр" ТӨҮГ-ын 2018.02.28-ны өдөр Зэсийн баяжмал худалдан авах гэрээнд хууль бусаар нөлөөлж өөртөө, бусдад давуу байдал бий болгосон гэх хэргийг шалгаж дуусаад, прокурорт хүргүүлсэн байна.
"Эрдэнэт үйлдвэр"-ийн зэсийн баяжмалын гэрээ зуучилсан гэх асуудлыг ХЗДХ-ийн сайд Х.Нямбаатар өөрөө онцлон ярьж байсан. "Эрдэнэт" ТӨҮГ болохоос өмнө бөгөөд Х.Бадамсүрэн захирлаар нь ажиллаж байсан үед хийгдсэн гэрээ гэснээрээ дээрх 2018.02.28-ны огноог баталж байна.
Эх сурвалжийн мэдээлдгээр, Kingpine, Тaurus хэмээх хоёр компани "Эрдэнэт"-д жилдээ У30 сая ам.долларын трейдерийн гэрээтэй гэдэг. Анх энэ гэрээ хийгдэхэд Монголд 6.3 сая ам.доллар орж ирсэн.
Х.Нямбаатар сайдын хувьд үүний 5 саяыг нь "Жэнко"-гийн хүмүүстэй, 1.3 саяыг нь Т.Бадамжунайтай холбон тайлбарладаг гэж ярьж байв.
Хамгийн гол нь трейдер компанийн гэрээг ил болгодоггүй, нууцалдаг бөгөөд энэ нь Гүйцэтгэх захирлын бүрэн эрхэд хамаарч явдаг онцлогтой. "Эрдэнэт үйлдвэр" төр ба хувийн хэвшлийн өмчид байх үед буюу "сахал" Д.Эрдэнэбилэг өндөр нөлөөтэй байх тэр цаг үед энэ трейдер гэрээ хийгджээ.
Бид өмнө нь энэ трейдер гэрээг бүтээж өгөх хүсэлтийг УИХ-ын гишүүн Ц.Мөнх-Оргил тавьж байсан уу гэх сэжмийг хөндөж бичиж байсан.
“Эрдэнэт үйлдвэр” нь ОХУ-ын эзэмшлээс Монголын хувийн хэвшлээр дамжин, манай улсад 100 хувь шилжсэний дараа трейдерүүдийн гэрээг чангалах процесс өрнөсөн байдаг. Энэ хүрээнд хэд хэдэн трейдерүүд хасагдаж, гэрээгээ хадгалж үлдэх чухал шаардлага компаниудад үүссэн. Чухам ийм сэжмээр гэрээгээ авч үлдэх шаардлагаар дээрх компаниуд “ёндоо” амласан харагддаг.
Харин хөшигний ард Ц.Мөнх-Оргил Т.Бадамжунайтай уг холболтыг хийж өгсөн бөгөөд өөрөө "Эрдэнэт"-ийн Б.Отгонбаатар нартай нэр холбогдож байсан. Хэдийгээр нээлттэй дата мэдээллээр тэр дээр дурдсан хоёр трейдер компанитай холбогдохгүй байгаа ч Ц.Элбэгдорж хийгээд С.Батболдын фракцад ойр гэдэг. Ц.Элбэгдоржийн үед "Эрдэнэт"-ийн Б.Отгонбаатарын өрөөнд ажиллагаа явуулах үеэр Ц.Мөнх-Оргил байж байсан ч гэдэг.
Ямартай ч Т.Бадамжунайн "Эрдэнэт"-ийн трейдер гэрээнд хууль бусаар нөлөөлсөн гэх хэрэг ийн шалгагдаж, прокурорт шилжсэн байна.
Үүнийг дагаад "Эрдэнэт"-ийн трейдер гэрээнүүдийг ил болгох хийгээд тухайн үед Гүйцэтгэх захирлаар нь ажиллаж байсан Х.Бадамсүрэн нарыг ч шалгах процесс өрнөж мэдэхээр байна.
Эх сурвалж: Eguur.mn
