Ховд аймгийн Мянгад сумын нутагт байрлах Алтан Xөхий хайрханы тэнгэрийг тайх Төрийн тахилгын ёслолын ажиллагааг долоодугаар сарын 22-ны өдөр зохион байгуулав.
Газар лусаа аргадан, ёс уламжлалаа өвлүүлэн уламжилдаг энэхүү төрийн тахилгын арга хэмжээг таван жилд нэг удаа зохион байгуулдаг уламжлалтай.
Уламжлалын дагуу Төрийн элч төлөөлөгчдийн тэргүүн байраа эзэлж, Хүндэт харуулын цэргүүд Монгол Улсын Төрийн далбаа, Бүх цэргийн Их хар сүлдний Өрнийн элч сүлд, Ховд аймгийн далбааг овооны талд, Чингис хааны хөрөг, Төрийн долоон эрдэнийг тахилгат овооны урд зассан тахилын ширээний ард залж байрлуулав.
Тайлга, тахилгын арга хэмжээг Ховд аймгийн Засаг дарга Э.Болормаа нээж үг хэллээ. Үүний дараагаар Монгол Улсын Төрийн дуулал эгшиглүүлж, “Алтайн магтаал” хайлав.
Төрийн тахилгат Алтан Хөхий уулын тэнгэрийг тайх ёслолын төрийн элч төлөөлөгчдийн тэргүүнээр Улсын Их Хурлын гишүүн, Зам, тээврийн хөгжлийн сайд С.Бямбацогт ажиллалаа.
Тэрбээр Ерөнхийлөгчийн илгээлтийг уншиж сонордуулах, тэнгэрт хүргэх дуут сумыг хуяг дуулга бүхий мэргэн харваачид гардуулах, тэнгэрийн хүлэг болгон морь сэтэрлэх, айлтгал бичиг, торго, арц хүж зэргийн дээжийг тахилгын гал мандлын бурханд өргүүлэн, тэнгэрт илгээх зэрэг зан үйлийг ёс жаягийн дагуу хийж гүйцэтгэлээ.
Монгол Улсын Ерөнхийлөгчийн зөвлөх Д.Бум-Очир Алтан Xөхий хайрханы тэнгэрт хандсан айлтгалыг дуудан сонсгож айлтгалын эх хувийг Ховд аймгийн музейд дурсгал болгон хадгалуулахаар аймгийн Засаг даргад гардуулан өгөв.
Төрийн тахилгат Алтан Хөхий уулын тэнгэрийг тайх ёслолын үеэр 32 бөхийн барилдаан, азарга, дааганы уралдаан, Урианхай сурын тэмцээн зохион байгууллаа.
Алтан Xөхий хайрханы тэнгэрийг тайх Төрийн тахилгын ёслолд Улаанбаатар, Дархан, Эрдэнэт хот болон Ховд, Увс аймгийн хил залгаа сумдын иргэдийн төлөөлөл оролцлоо.
Тахилгын өмнөх орой буюу долоодугаар сарын 21-ний орой уламжлалын дагуу “Долоон бурхан одны тахилга”-ыг аймгийн Засаг даргын Тамгын газар зохион байгууллаа.
Энэ үеэр аймгийн төв хийдийн лам нар Итгэл, Ганданлажаа, Өлзийхутаг буулгах сан болон долоон бурхан од тус бүрт тахилгын ном хурж сүсэгтэн олон даган баясав гэж Ховд аймгийн ЗДТГ-аас мэдээллээ.
