Эдийн засгийн өсөлт удаашралтай байгаа ч Хятад Оросын нефтийг хямд үнээр худалдаж авах талаараа дээд амжилт тогтоож байна. Оросын газрын тос Саудын Араб болон бусад орны түүхий эдээс хамаагүй бага өртөгтэй байгаа энэ цаг мөчийг ашиглаж байна гэж шинжээчид үзэж байна.
Financial Times сонины гаалийн мэдээлэлд үндэслэн хийсэн тооцооллоор Хятад улс 2023 оны эхний хагаст ОХУ-аас өдөрт дунджаар 2.13 сая баррель нефть импортолсон байна.
Үүний зэрэгцээ, зургадугаар сард ОХУ-аас импортолсон нефтийн хэмжээ түүхэн дэх хамгийн өндөр хэмжээ буюу 2,57 сая баррель болжээ. Тодотгоход өмнөх тавдугаар сард 2,3 сая баррель ипортолсон бөгөөд энэ нь дээд амжилт тогтоогоод байсан юм.
Хятадын гаалийн мэдээгээр Украинд дайн эхэлснээс хойш Оросын газрын тос бусад ОПЕК+ орнуудын түүхий эдээс хамаагүй хямд байсан. 2022 оны 3-р сараас 4-р саруудад ОХУ-д газрын тос хамгийн үнэтэй үедээ нэг баррель нь 105 доллараас гаруй байв. Харин энэ хоёр сарын хугацаанд дэлхийн зах зээл дээр Брент маркийн нефть 100-140 ам.долларын үнэтэй байсан юм.
ОПЕК+-ийн бусад орнууд дайны эхний хоёр сард Хятадад газрын тосоо 110-113 доллар, зуны улиралд бараг 120 доллараар зарсан байна. Харин Оросын үнэ тэр үед аль хэдийн буурч байсан бөгөөд наймдугаар сар гэхэд нэг баррель нь 92.5 ам.доллар болж буурчээ.
2023 оны зургадугаар сард Оросын нэг баррель газрын тосны нийлүүлэлтийн дундаж үнэ 67.9 ам.доллар байсан бол Саудын Араб нефтээ үүнээс 10.7 ам.доллараар нэмж зарж байв.
2022 оны арванхоёрдугаар сараас хойш барууны орнууд Оросын нефтийн үнийг баррель тутамдаа 60 ам.доллар байхаар дээд хязгаар тогтоосон. Хэдийгээр Хятад үүнээс илүү өндөр үнээр худалдаж авч байгаа ч Оросын газрын тос өнгөрөгч оны 11-р сараас хойш бараг сар бүр хямдарч байна.
Эх сурвалж: Мoscowtimes.ru
