Сүүлийн үеийн туршилтаар өндөр хурдны галт тэрэг 453 км/цаг хурдалсан нь Хятад улс энэ чиглэлээр хурдацтай хөгжиж буйн бас нэг нотолгоо боллоо гэж Хятадын төмөр замын үндэсний оператор компани мэдэгдэв.
Туршилтыг Фүжянь мужийн Фүжоу, Шямэнь хотыг холбосон өндөр хурдны төмөр замын хэсэгт шинэ технологийн эд ангиудаар тоноглогдсон галт тэрэгний гүйцэтгэлийг үнэлэх зорилгоор хийсэн.
Туршилтын галт тэрэгнүүд эсрэг чиглэлд явж, бие биетэйгээ зөрөн өнгөрсөн бөгөөд эхний удаад Мэйжоу булангийн гүүрээр 453 км/цаг хурдалж байсан бол маргааш нь хурдны замын хонгилоор 420 км/цагийн хурдтай явжээ.
Одоогийн байдлаар Хятадын хамгийн хурдан хурдны галт тэрэгнүүд Бээжин-Шанхай, Бээжин-Тяньжин Бээжин-Жанжиаку, Чэнду-Чунчин хурдны төмөр зам зэрэг хэд хэдэн шугамаар 350 км/цагийн хурдтай явж байгаа юм.
Туршилтын дүнгээс үзвэл, галт тэрэгний шинэ бүрэлдэхүүн хэсгүүд маш сайн гүйцэтгэлтэй байсан нь Хятад улсын CR450 EMU өндөр хурдны галт тэрэгний бүтээн байгуулалтын ололт амжилтыг харуулж байна. Туршилтууд нь мөн CR450 Шинжлэх ухаан, технологийн шинэлэг төслийг жигд ажиллуулах бат бөх суурийг тавьж өглөө.
Энэхүү төсөл нь үндэсний 14-р таван жилийн төлөвлөгөөний (2021-25) нэг хэсэг болох судалгаа, хөгжлийн томоохон хөтөлбөр гэдгийг төмөр замын салбарынхан онцолж байна. Үүний хүрээнд шинэ төрлийн Fuxing EMU галт тэрэг үйлдвэрлэхээр төлөвлөж байна.
EMU галт тэрэгний шинэ үеийг амжилттай хөгжүүлэхийн тулд их хэмжээний загварчлалын судалгаа, шинэ технологийн бүрэлдэхүүн хэсгүүдийн шугаман туршилт зэргийг хийх шаардлагатай байна.
Туршилтын үеэр шинэ CR450 EMU бүрэлдэхүүн хэсгүүдийн техник эдийн засгийн үндэслэл, тогтвортой байдлыг шалгахын тулд 57 R&D туршилтыг явуулсан. Туршилтыг Хятадын Төмөр замын Шинжлэх Ухааны Академи, CRRC Төмөр замын машин үйлдвэрлэлийн корпораци, Бээжингийн Жяотон их сургууль, Баруун Өмнөд Жяотон их сургууль, Төв Өмнөдийн их сургууль зэрэг судалгааны байгууллага, аж ахуйн нэгж, их дээд сургуулиуд хамтран хийсэн байна.
Бүрэлдэхүүн хэсгүүдийн мэдээллийг янз бүрийн хурдтайгаар, төмөр замын янз бүрийн хэсэгт, тухайлбал туннель, гүүр, муруй замд жолоодох үеэр гэхчлэн цуглуулсан. Туршилтаас харахад шинэ технологи ашигласнаар галт тэрэгний зарим үзүүлэлт сайжирсан байна.
Үүнээс гадна Хятадын өндөр хурдны галт тэрэгний аюулгүй байдал, эрчим хүч, эрчим хүчний хэрэглээ, хурдатгалын үзүүлэлт, тоормосны тогтвортой байдал зэргээрээ дэлхийд тэргүүлсээр байх болно гэдгийг харуулж байна.
Эх сурвалж: Tos. media
