Хятадын ГХЯ-ны сайд Чин Ган гурван долоо хоног гаруй хугацаанд олны өмнө гараагүй нь түүний хувь заяаны талаар олон янзын таамаглал, цуурхал гарахад хүргээд байна.
Өдгөө 57 настай дипломатч сураггүй алга болсонд Хятадын ГХЯ-ны албан ёсны төлөөлөгчид удирдагчийнхаа хувь заяаны талаарх асуултад тодорхой хариулт өгөхгүй байна.
Өнгөрсөн даваа гарагт ГХЯ-ны хэвлэлийн хурал дээр Чин Ган хаана байгаа талаар асуухад энэ талаар өгөх ямар ч мэдээлэл байхгүй гэж тус яамны төлөөлөгч Мао Нин мэдэгджээ.
Хятадад өндөр албан тушаалтан гэнэт алга болвол тэр ноцтой асуудалд орсон гэсэн үг юм. Тиймээс Мао Нингийн дээрх хариулт Гадаад хэргийн сайдын хувь заяаны талаар цуурхал, хардлагын давалгааг төрүүлээд байна.
Алга болсон сайд
Тэр бол Хятадын түүхэн дэх Гадаад хэргийн хамгийн залуу сайд бөгөөд АНУ-д Элчин сайдаар хоёр жил ажиллаад энэ албанд томилогдсон юм.
Чин Ган хамгийн сүүлд зургадугаар сарын 25-нд Бээжинд Шри Ланкийн Гадаад хэргийн сайдтай уулзахдаа мэдээлсэн байна. Энэ үйл явдлын дараагаас тэр алга болсон.
Мөн Чин Ган АНУ-ын Сангийн сайд Жанет Йеллентэй хэлэлцээ хийж буй Хятадын албаны хүмүүсийн дунд бас байгаагүй.
Тэрээр мөн одоо Хятадад үргэлжилж буй цаг уурын асуудлаарх яриа хэлэлцээний үеэр Жон Керритэй уулзаагүй. Өнгөрсөн долоо хоногт Индонезид болж буй АСЕАН-ы уулзалтад Чин Ган Бээжингийн төлөөлөгчдийг ахлах ёстой байсан ч эцсийн мөчид өөр хүн ахлах болов. БНХАУ-ын ГХЯ-ны спикер Ван Вэнбинь сайд эрүүл мэндийн шалтгаанаар Индонез руу явахгүй гэж мэдэгдсэн ч илүү тодорхой мэдээлэл өгөөгүй. Сайдын оронд төлөөлөгчдийг БНХАУ-ын Коммунист намын Төв Хорооны Гадаад харилцааны комиссын дарга Ван И тэргүүлсэн байна.
Хятад улс эдгээр өдрүүдэд уулзалт хийх боломжгүй гэж ЕХ-нд мэдэгдсэний дараа Хятадын Гадаад хэргийн сайд болон Европын холбооны гадаад бодлогын тэргүүн Жозеп Боррелл нарын яриа хэлэлцээ мөн хойшлогджээ. Энэ шийдвэрийн шалтгааныг тайлбарлаагүй байна.
Даваа гарагт болсон Хятад улсын дарга Ши Жиньпин болон Филиппиний ерөнхийлөгч асан Родриго Дутерте нарын уулзалтад Чин Ган мөн оролцоогүй байна.
Хувилбар ба цуу яриа
Өнгөрсөн хугацаанд Хятадын өндөр албан тушаалтнууд эхлээд удаан хугацаанд ямар ч тайлбаргүйгээр алга болж, дараа нь эрүүгийн хэрэгт яллагдагчаар татагдсан тохиолдол нэг бус удаа гарч байсан.
Мөн алга болсны дараа тэд өмнөх байр сууриндаа, сураггүй байсан шалтгаанаа тайлбарлахгүйгээр гэнэт гарч ирэх магадлал бас байдаг.
Чухамдаа Ши Жиньпин өөрөө хүртэл Хятадын удирдагч болохоос өмнөхөн хоёр долоо хоног сураггүй болсон. Энэ нь нэгдүгээрт, түүний эрүүл мэндийн байдал, хоёрдугаарт, Хятадын Коммунист намын дээд хэсэгт эрх мэдлийн төлөөх далд тэмцлийн тухай цуу яриа гарахад хүргэж байв.
Албан ёсны мэдээлэл дутмаг байгаатай холбогдуулан Хятадын олон нийтийн сүлжээ эдүгээ цуурхалд автаад байна. Сүүлийн 7 хоногийн хугацаанд Хятадын хамгийн том хайлтын систем болох Baidu-д Чин Ган гэсэн хайлт 5000 гаруй хувиар нэмэгдэж, одоо гадаад хэргийн сайдын хувь заяа Хятадын хамгийн алдартай одуудаас хамаагүй илүү сонирхолтой болж байна.
Хамгийн түгээмэл цуурхалын нэг нь Чин Ганг гэр бүлээс гадуур ямар нэгэн романтик харилцаатай байсан нь тогтоогдсоны дараа мөрдөн байцаалтын шатанд байгаа гэсэн таамаглал юм.
Эх сурвалж: ВВС
