“Чингис хаан олон улсын нисэх буудал” гэсэн бичигтэй ширмэн тагнууд “ Хүннү”, “Ривер Гарден” зэрэг хорооллуудад байдаг. Иргэний нисэхийн Ерөнхий газрын захиалгаар “Алтан ширэм” ХХК нь 2016 оноос эдгээр логотой тагнуудыг үйлдвэрлэсэн байна. Гэвч яагаад байх ёстой газраа биш хаа байсан орон сууцны хорооллуудын траншейны таг болчихсон явна вэ. Хулгайн таг гэж үү хэмээх асуулт иргэдийн дунд өрнөв. Нийслэлийн хэмжээнд нийт 50 мянга орчим траншей байх бөгөөд ширмэн тагны үнэ 2016-2018 онд дунджаар 500 мянган төгрөг орчим байсан учраас нэлээдгүй хулгайд өртдөг байв. Таггүй траншей олширсноос иргэд ч гэмтэж бэртэх тохиолдол байв. Траншейны тагны хулгай ихэссэн учраас ОСНААУГ болон Ус сувгийн удирдах газраас логотой таг хийх, стандартын дагуу түгжээтэй болгох гэх зэрэг шат дараатай ажлууд хийж эхэлсэн байна. 2020 оноос траншейны тагны хулгай харьцангуй багассан.
Тиймээс “Чингис хаан олон улсын нисэх буудал” гэсэн бичигтэй ширмэн тагнууд хулгайнх уу гэдэг асуултад “Хүннү-2222” СӨХ-ны зүгээс “Иргэний Нисэхийн Ерөнхий газар нь энэхүү худгийн тагийг “Алтан ширэм” ХХК-д захиалан хийлгэсэн бөгөөд үг үсгийн алдаатай, нимгэн хийж захиалгын шаардлага хангаагүй тул буцаагдсан бна. Энэ үед ХУРД групп болон бусад захиалга өгсөн ХХК-уудад дээрх буцаагдсан тагнуудыг бэлэн байсан тул нийлүүлсэн бна. “Алтан ширэм” ХХК, Нисэхийнхэн нийлүүлэлт хийсэн худгийн тагаа тоолоход бүрэн байсан бна. Энэ талаар дээрх байгууллагууд мэдэгдэл хийхээр болсон” гэсэн мэдээлэл өгчээ. Хэдийгээр хулгайн таг биш гэж тайлбарласан ч бид чанаргүй зүйлээр траншейгаа тагласан гэсэн мэдээлэл өгсөн байгаа юм. Гэтэл тус хорооллуудад хэчнээн хүн ажиллаж амьдардаг билээ. Захиалгын шаардлага хангаагүй буцаагдсан гэхээр стандартын тагнаас доогуур үнээр худалдаж авчээ хэмээн автоматаар ойлгогдож байгааг яалтай.
