ҮСХ-оос Монгол Улсын нийгэм, эдийн засгийн 2023 оны эхний хагас жилийн статистик үзүүлэлтүүдийг танилцуулж байна. Мэдээллийг ҮСХ-ны Нэгдсэн статистикийн газрын ахлах статистикч С.Норов танилцуулж байна.
Тэрбээр "2023 оны зургаадугаар сард инфляц 10,6 хувь гарсан байна. Энэ нь өмнөх оны мөн үеэс 10,6 хувиар, өмнөх сараас 1 хувиар өссөн байна. Хэрэглээний бараа, үйлчилгээний үнэ энэ оны зургаадугаар сард өмнөх оны мөн үеэс 10,6 хувиар өсөхөд хүнсний бараа, ундаа, усны бүлгийн үнэ 18,2 хувиар, согтууруулах ундаа, тамхины бүлгийн үнэ 7,3 хувиар, хувцас, бөс бараа, гутлын үнэ 11,7 хувиар тус тус өссөн нь голлон нөлөөлжээ.
Мөн Мөнгөний нийлүүлэлт энэ оны зургаадугаар сарын эцэст 31.4 их наяд төгрөг болж, өмнөх оны мөн үеэс 3.8 их наяд төгрөгөөр буюу 13.8 хувь өссөн байна. Үүнд:
- Төгрөгийн харилцах 2.1 их наяд төгрөгөөр
- Валютын хадгалам 669.5 тэрбум төгрөг буюу 8 хувиар өссөн нь голлон нөлөөлсөн аж.
Төгрөгийн хадгаламж зургаадугаар сарын эцэст 14.4 их наяд төгрөг болж, өмнөх оны мөн үеэс 4.1 хувиар өссөн байна. Төгрөгийн хадгаламжийн
- 87.3 хувийг иргэдийн хадгаламж
- 12.3 хувийг ААН байгууллагын хадгаламж эзэлж буй.
Анхаарал хандуулах зээлийн өрийн үлдэгдэл энэ оны зургаадугаар сарын эцэст гурван их наяд төгрөг болж өмнөх оны мөн үеэс 221.2 тэрбум төгрөг буюу 20 хувиар өссөн байна. Анхаарал хандуулах зээлийн өрийн үлдэгдэл нь нийт зээлийн өрийн үлдэгдлийн 5.2 хувийг эзэлж байна.
Мөн чанаргүй зээлийн өрийн үлдэгдэл 2.2 их наяд төгрөг болж, өмнөх оны мөн үеэс 112.3 тэрбум төгрөгөөр буюу 5.3 хувиар өссөн байна." гэв.
