Архитекторыг Меган Уотерман, Амбер Костелло, Мелисса Бартелеми нарыг хөнөөсөн хэрэгт буруутгаж байна
АНУ-ын эрх баригчид арав гаруй жилийн өмнө Нью-Йорк хотын ойролцоо гарсан хэд хэдэн цуврал аллагын сэжигтнийг илрүүлснээ зарлалаа.
Энэ мэдэгдэлд "Бид 2010-2011 онд Лонг-Айлендын далайн эргээс олдсон залуу эмэгтэйчүүд голдуу 11 хүний амь насыг хөнөөсөн сэжигтний тухай ярьж байна" гэж онцолжээ.
Олон жилийн мөрдөн байцаалтын эцэст орон нутгийн прокурорууд баасан гарагт гол сэжигтэн 59 настай Нью-Йоркийн архитектор Рекс Хойерманныг баривчилсан гэж мэдэгдэв. Түүний идсэн пиццаны үлдэгдлээс ДНХ-ийн ул мөрийг нь гаргаж авч чадсан бөгөөд тэр нь хохирогчдын нэгээс олдсон ДНХ-тэй таарчээ. Үүний дараа цагдаа нар түүнийг баривчилсан байна.
Хойерманныг 2009 онд алагдсан Мелисса Бартелеми, 2010 онд алагдсан Меган Уотерман, Амбер Костелло гэсэн гурван эмэгтэйг хөнөөсөн хэрэгт хэрэгт буруутгаж байна. Мөн тэр 2007 онд алагдсан дөрөв дэх эмэгтэй болох Морин Брайнард-Барнс хэргийн гол сэжигтэн юм.
Цуврал аллагад буруутгагдаж буй Нью-Йоркийн архитектор Рекс Хойерманн
Энэ дөрвөн эмэгтэй хэвлэлээр “Гилго-гийн дөрөв” хэмээн алдаршжээ. Тэдний шарилыг 2010 оны арванхоёрдугаар сард, мөн оны тавдугаар сард сураггүй алга болсон өөр нэг хүн болох 23 настай Шаннен Гилбертийг хайх ажиллагааны үеэр санамсаргүйгээр олсон юм.
Эдгээр дөрвөн цогцосны дараа цагдаа нар бүхэл бүтэн ижил төстэй оршуулга олсон бөгөөд нийт 11 хүн байжээ. Амиа алдсан залуу эмэгтэйчүүдийн ихэнх нь биеэ үнэлж байсан гэж мөрдөн байцаагчид үзэж байна.
Цуврал алуурчдын хохирогчдын дунд нэг эрэгтэй, охин хоёр мөн байсан. Охин, түүний ээж, эрэгтэй зэрэг дөрвөн хүний хэн болох нь одоо хүртэл тодорхойгүй хэвээр байна.
Эрх баригчдын мэдээлснээр Хойерманн пүрэв гаригийн орой баривчлагдсан бөгөөд баасан гаригт яллагдагчаар татагдсан, шүүх түүнийг батлан даалтад гаргахаас татгалзсан байна.
Саффолк дүүргийн цагдаагийн комиссар Родни Харрисон хэвлэлийн бага хурал дээр "Рекс Хойерманн бол бидний дунд алхаж явсан чөтгөр, гэр бүлүүдийг хагацалд учруулсан араатан" гэж хэлжээ.
Яллагдагч өмгөөлөгчөөрөө дамжуулан шүүх хурал дээр өөрийгөө гэм буруугүй гэж мэдэгдсэн. Үүний дараа тэрээр нулимс дуслуулжээ. Түүний хэргийн дараагийн шүүх хурал наймдугаар сарын 1-нд болохоор товлогдоод байна
Netflix телевизийн "Алдагдсан охид" кино нь өнөөдрийг хүртэл тодорхойгүй байсан эдгээр үйл явдалд зориулагдсан байдаг.
1987 оноос хойш Манхэттэн хотод ажиллаж байгаа архитектор Хоерманн 2022 оны эхээр сэжигтнээр тодорчээ. Түүнээс хойш мөрдөн байцаагчид түүнийг болон гэр бүлийнхнийг хянаж, тэдний хогийн савнаас ДНХ-ийн дээж цуглуулсан байна.
Прокурор хэлэхдээ, яллахад шаардлагатай сүүлчийн нотлох баримт бол 2023 оны 1-р сард Манхэттен дэх хогийн саванд хаясан пиццаны хаягдал юм. Пиццаны царцдасаас олдсон ДНХ-ийн бүрэн хэмжээний дээж нь хохирогчдын нэгийг ороосон тааран дээрх удамшлын материалтай ижил байжээ. Энэ нь мөрдөн байцаалтын явцад гарсан амжилт байв. Түүнчлэн утасны дуудлага, хэргийн газрын ойролцоо гэрчийн харсан ногоон өнгийн пикап машин гэхчлэн нотлох баримтууд байгаа гэжээ.
Сэжигтэн Рекс Хойерманн бол Нью-Йорк хотын архитектурын шилдэг фирм гэж өөрийгөө зарладаг Манхэттенд төвтэй "RH Consultants and Associates" архитектурын фирмийн эзэн юм.
AP агентлагийн мэдээлснээр тэрээр охин болон дагавар хүүтэй гэжээ. Сэжигтний хөрш түүний тухай "Тэр олон жилийн турш өглөө бүр ажилдаа костюм, зангиа зүүж, цүнх барьж явдаг байсан" гэжээ.
Рекс Хоерманн 92 бууны лицензтэй байсан бөгөөд галт зэвсэг агуулсан "маш том сейф"-тэй байжээ. Мөн түүний компьютероос "эрүүдэн шүүсэн порно", "эмэгтэйчүүдийн хүчирхийлэлд өртөж, алагдсан зургууд" олдсон байна.
Эх сурвалж: ВВС
