Сүүлийн өдрүүдэд сошиал орчноор өмхийрсөн махыг үнэргүй болгодог, мөн махны жинг хүнд болгох зорилгоор тусгай бодис бүхий саванд хийж бэлтгэж байгаа талаарх бичлэг цацагдсан. Энэ дагуу ШӨХТГ-аас шалгалт хийж, махнаас дээж авч шинжилгээнд хамруулсан байна. Гэвч одоогоор шинжилгээний хариу гараагүй байгаа аж.
Эмээлтэд байрлах тухайн компани нь Хятадын хөрөнгө оруулалтай "Эм Ди Си Пи" гэх компани бөгөөд экспортын зориулалтаар мах бэлтгэсэн гэх боловч экспортлох тусгай зөвшөөрөлгүй байгаа нь шалгалтын явцад илэрчээ. Мөн ШӨХТГ-аас хийсэн шалгалтын явцад тухайн үйлдвэрийн агуулах хөлдөөгчнөөс өөр тусгай зөвшөөрөлтэй компанийн шошготой мах гарч ирсэн байна. Энэ нь өөр компанийн нэр дээр мах бэлтгэж, тусгай зөвшөөрөлтэй компани нь гадагшаа гаргах төлөвлөгөөтэй байх магадлалтай юм.
Тусгай зөвшөөрөлтэй компани нь "ХКҮ" ХХК буюу иргэдийн сайн мэддэгээр "Махимпекс" ХК-ийн салбар үйлдвэр хэлбэрээр үйл ажиллагаа явуулж, хиам болон мах махан бүтээгдэхүүн үйлдвэрлэдэг бие даасан компани юм.
Шалгалтын явцад тухайн компаниас "ХКҮ" ХХК-ийн мах махан бүтээгдэхүүнийг зөвхөн хадгалж байсан гэх мэдүүлгийг өгчээ.