Өмнөд Европ болон АНУ-ын олон бүс нутагт хэт халуун болж байна. Бямба гарагт Италийн 16 хотод хэт халууны улмаас улаан түгшүүр зарлажээ. Калифорнийн Үхлийн хөндийд + 54С-ээс давж халах төлөвтэй байна.
Европт цаг агаарын улаан дохио нь эрүүл хүмүүс ч эрсдэлд орно гэсэнсануулга юм. Цаг уурчид олон хүн цуглардаг аялал жуулчлалын газруудад онцгой анхаарал хандуулдаг. Ялангуяа Италид эдгээр нь Ром, Флоренц, Болонья, Пиза болон бусад хотуудад.
Италийн эрх баригчид "улаан" ангилалд багтдаг бүс нутгуудад наранд гадаа гарахгүй байх, кофе, согтууруулах ундаа хэрэглэхгүй байх, өдөрт дор хаяж хоёр литр ус уухыг зөвлөж байна.
Испани, Франц, Герман, Польш болон бусад оронд цаг агаарын эрс тэс нөхцөл байдал ажиглагдаж байна.
Ирэх долоо хоногт Европын өмнөд хэсэгт агаарын температур улам нэмэгдэж, зарим газраар 40 хэм хүртэл халах төлөвтэй байна. Жишээлбэл, Грек улсад ийм температур хэд хоногийн турш ажиглагдаж байна. Баасан гарагт жуулчдын эрүүл мэндийг хамгаалах үүднээс Афины гол үзмэр Акрополисыг хаажээ.
Улаан загалмайн нийгэмлэгийн бригадууд Грекийн хотуудын гудамжинд жижүүр хийж, хүссэн хүмүүст лонхтой ус тарааж, тусламж үзүүлж байна.
Хэд хэдэн улс оронд, ялангуяа хүчтэй салхитай бүс нутагт ой хээрийн түймэр гарах аюултайг мэргэжилтнүүд анхааруулж байна.
Чехийн цаг уурын албанаас энэ амралтын өдрүүдэд тус улсад +38 хэм хүрч халах төлөвтэй байгааг анхааруулж байна.
Ажиглалтын бүх хугацаанд Европ дахь халууны дээд амжилт 2021 оны 8-р сард Сицилид +48 градусыг тэмдэглэжээ.
АНУ-ын түгшүүртэй статистик
Мөн АНУ, Хятад, Японд хэт халсан байна. АНУ-ын нийт хүн амын гуравны нэг нь энэ амралтын өдрүүдэд хэт халуунд өртжээ. Флорида, Техас, Калифорниа зэрэг угаас дулаан мужууд төдийгүй, хойд хэсгийн харьцангуй сэрүүн гэгддэг Канадтай хиллэдэг баруун хойд Вашингтон муж ч ялгаагүй халуунд өртөж байна. Зарим газраар 43-46 хэм хүрч хална.
АНУ-ын Үндэсний цаг уурын албаны (NWS) мэдээлснээр одоогийн халуун циклон нь хэд хэдэн бүс нутагт түүхэн дэх хамгийн хүчтэй халууны тохиолдол болно.
АНУ-ын Өвчний хяналт, урьдчилан сэргийлэх төвийн статистик мэдээгээр тус улсад жил бүр 700 орчим хүн халууны улмаас нас бардаг гэж мэдээлжээ.
Техасын нийслэл Финикс хотод 18 өдөр дараалан +43 халсан тул өмнөх бүх цаг үеийн рекордоо эвдэхэд ойрхон байна.
Невада мужийн Лас Вегаст +47С градус халж түүхэн дээд амжилтаа давтав.
Мөн манай гарагийн хамгийн халуун газруудын нэг болох Калифорни дахь Үхлийн хөндийд 2021 онд агаарын температур 54,4 хэм хүрч халж байв. Одоо мөн энэ давтагдах бололтой.
АНУ-ын олон хотуудын цэцэрлэгт хүрээлэн, музей, амьтны хүрээлэнгүүд бүрэн хаагдсан эсвэл ажиллах цагийг эрс багасгаад байна.
Эх сурвалж: ВВС
