Сөүлээс машинаар хоёр цаг явахад ой модтой толгод, будааны тариалангийн дунд өндөр хашаа, харуул хамгаалалттай хаалганы цаана хачирхалтай гэмээр харагдах олон давхар цогцолбор бий. БНАСАУ-аас ирсэн бүх дүрвэгсдийг энд гурван сарын хугацаанд "дахин сургах"-аар илгээдэг. Тэдэнд энд Өмнөд Солонгосын амьдралын онцлог, хэв маягийг заадаг.
Ханавон дахь энэ төв нь эмнэлгийн болон боловсролын байгууллага бөгөөд мэргэжлийн сургууль шиг юм.
Ким Чен Уны дэглэмийн өлсгөлөн, хэлмэгдүүлэлтээс амь насаа эрсдэлд оруулан байж зугтаж чадсан Хойд Солонгосын бүх иргэд энд ирдэг. Сүүлийн жилүүдэд ийм дүрвэгсэд тун цөөхөн байна.
Арван жилийн өмнө жилд бараг 3 мянган хүн энд ирдэг байв. Дараа нь энэ урсгал аажмаар цөөрч эхэлсэн бөгөөд тахлын үеэр Хойд Солонгос бүх хилээ чанд хаиуу хаасны улмаас тус төв зуу хүрэхгүй хүнтэй болжээ.
Гэсэн хэдий ч Өмнөд Солонгос Ханавон дахь төвөө хаахгүй, өргөжүүлнэ гэж амласан. Сөүлийн эрх баригчид Хойд Солонгос тахлын дэглэмээ хөнгөвчлөхийн хэрээр олон хүн эх орноосоо дүрвэх боломжтой болж, Ханавон төв дахин дүүрнэ гэж үзэж байна. Тиймээс үүнд сайтар бэлтгэх хэрэгтэй.
БНАСАУ-аас ирсэн дүрвэгсэд тус төвд 22 төрлийн дамжаанд суралцаж, үсчин, нарийн боовчин, оёдолчин зэрэг мэргэжлээр суралцах боломжтой.
Мэргэжлийн хичээлээс гадна технологийн хувьд эх орноос нь хэдэн арван жилээр түрүүлж байгаа улсад хэрхэн амьдрахыг тэдэнд бас заадаг. Тухайлбал, энд нэг ангийг гэхэд л орчин үеийн электрон төхөөрөмж зардаг дэлгүүрийн загвараар тохижуулсан байх бөгөөд тэнд таблет, ухаалаг гар утас, компьютер зэргийг тавиур дээр байрлуулжээ.
Өөр нэг блокийн бүхэл бүтэн давхар нь орчин үеийн эмнэлэг шиг харагдаж байна. Жижигхэн тасаг, эмч нарын зөвлөгөө өгөх өрөөнүүд, цагаан халаадтай эмч нар хаа сайгүй бужигнаж байх жишээний.
Хойд Солонгосын дүрвэгсэд зөвхөн бие махбодь төдийгүй сэтгэл зүйн асуудалтай тул яаралтай тусламж шаардлагатай байдаг. Сэтгэцийн эмч Чон Чин Ён Ханавонд ажиллаж байсан бөгөөд энэ төвөөр дамжин өнгөрсөн хүмүүсийн аймшигтай түүхийг сайн мэдэх юм.
Чон эмчийн хэлснээр хүмүүс зугтах стресс, баригдаж буцаагдах вий гэсэн айдастай тулгардаг. Олон хүмүүс Хойд Солонгост ахиж хэзээ ч уулзахгүй байж магадгүй хамаатан садангаа орхисондоо өөрийгөө буруутай гэж боддог.
Мөн хэн нэгэнд гадуурхагдах вий гэдгээс эмээж, Хойд Солонгосын дүрвэгч гэдгээ нуухыг илүүд үздэг.
Доктор Чон “Миний нэг үйлчлүүлэгч ресторанд үдийн хоол идэж байтал зурагтаар Хойд Солонгос дахин пуужин харвасан тухай мэдээ гарсан. Тэр маш тавгүйтэж болж, оройн хоолоо хурдан дуусгаад ресторанаас гарч байсан. Хүмүүс түүнийг БНАСАУ-ынх гэдгийг мэдвэл юу гэж бодох бол гэж маш их санаа зовж байсан" гэж ярьжээ.
Эх сурвалж: ВВС
