Үндэсний их баяр наадмын хүчит бөхийн барилдааны долоогийн даваанд барилдааны цаг болсон хэмээн хөлийн цэцийн шийдвэрээр Даян аварга Н.Батсуурийг Улсын арслан Ц.Содномдоржоор давсан хэмээн шийдвэрлэсэн. Хөлийн цэцийн шийдвэр гарсны дараа үзэгчид барилдуулахыг шаардаж, Ц.Содномдорж тахимаа өгөлгүй хэсэг зогссоны эцэст тахимаа өгсөн юм.Уг дүрмийн талаар Далай даян, дархан аварга Х.Баянмөнх "Идэвхгүй барилдсаныг хасдаг бол бүр үндсээрээ буруу байна. Монгол бөхчүүд сүн далайг шалба, сүмбэр уулыг дов болтол барилдаж нэг нь дийлж, нөгөө нь унадаг дүрэмтэй!" гэсэн юм. 
Зохиолч Р.Эмүжин Далай даян, дархан аварга Х.Батмөнхтэй санал нэг байгаагаа илэрхийлэн өөрийн байр сууриа илэрхийлжээ. Тэрбээр "Олон сайхан аварга, арсланг олом ч үгүй, олон ч үгүй болгох тэнэг дүрмээ татаж ав!...Монголчууд хэзээ ч ялалт, ялагдал хоёрын дунд, гурвын хооронд үлдэж байгаагүй. Сүү ч биш, ээдэм ч биш, сүүл ч биш, мах ч биш гээд аман зохиол, ардын ухаанд сийлээстэй үлдсэн итгэл ба үнэмшил. Энэ бол туулсан түүх, тулсан газар нутагтай нь сүү цусны барилдлагатай, язгуурын үзэл санаа. Ялж байж газар нутаг, мал ахуй, амь амьдралтайгаа үлдэнэ, ялагдсан нь хамжлага болж хамагдан одно. Хэдэн зууны түүхээрээ, хэдэн мянган дайчдынхаа амь насаар дэлхийн бөөрөн дээр тамгалсан энэ үзэл санаа өчигдөр Даян аварга Батсуурь, арслан Содномдорж нарын барилдааны дараа оволзоод босоод ирлээ. Далай даян, дархан аварга Баянмөнх гуай ч маш тодорхой хэлсэн байна. Монгол бөх бол унаж, унагааж байж ялалт, ялагдлаа хүлээн зөвшөөрч, итгэл үнэмшлийн дээд төвшнийг тогтоож ирсэн уламжлалтай гэдгийг "Сүн далайг шалбааг болтол, сүмбэр уулыг дов болтол..." барилдан байж бай шаваагаа авдаг талаар ч дурджээ. Энд Даян аварга Батсуурийн ч буруу байхгүй, арслан Содномдоржийн ч буруу байхгүй. Монголын үндэсний бөхийн холбооны тэргүүлэгчид 2022 оны тавдугаар сард дүрэмдээ өөрчлөлт оруулсан, тэгэхдээ зодог шуудаг, элэг бүсний хэмжээг ч маш нарийн зааж өгсөн. Энэ тохиолдолд Батсуурь аварга гар хэрчмээр нарийхан элэг бүстэй гэхчлэн гоочлох нь өөрөө гүтгэлэг. Хэрэв тийм бол энэ хүн чинь аль эрт хасагдчихсан байгаа. Энд дурдсанаар жил гаруйн өмнө дүрэмдээ оруулсан өөрчлөлтөөр аварга, арслан хоёрын барилдааныг хөлийн цэц шүүж, Батсуурьт даваа өглөө. За уучлаарай, хэрэв Баянмөнх, Мөнхбат аваргуудын барилдааныг энэ дүрмээр шүүсээр ирсэн бол өдийд энэ сайхан бөхчүүдэд маань нэр төр үлдэх байсан уу? Итгэн сүсэлдэг бөх сонирхогчдод нь итгэл үнэмшил үлдэх байсан уу? Улсын наадамд 12 түрүүлсэн Бат-Эрдэнэ аварга л гэхэд идэвхээр даваад байсан бол өнөөдөр хүндлэлийн хойморт хүрэх байсан уу? Үгүй. Ард түмэн тэдний даваанд, тэдний цолонд ч хүндэтгэлгүй хандах байсан. Өчнөөн олон зууны турш өвдөг шороодоогүй бөхөөрөө бахархаж ирсэн бахархлыг дүрмээр дүүжлээд үгүй болгоно гэж байхгүй. Өвдөг шороодоогүй гэдэг үг хэллэг монгол хэлзүйд, монгол сэтгэлгээнд сууж үлдсэн, асар том агуулга болоод утга, бахархал болоод омогшил илэрхийлдэг. Ноёны өмнө өвдөг бохироогүй, харь дайсны өмнө харьт нугалаагүй...гэхчлэн түүхэн цаг үеийг түүвэрлэн илэрхийлдэг сэтгэлгээ юм шүү. Тэгэхээр энэ тохиолдолд Монгол бөхийн дүрэмд сэм сэмхэн гар дүрэхдээ ард түмнийхээ уламжлал, ёс заншил, сэтгэлгээ, сэтгэлзүйн онцлог дээгүүр шавхайтай гутлаар туучмааргүй байна аа. Тэр тэргүүлэгчид гэж ямар хүмүүс байдаг юм, яаж сонгогддог юм, ямар цалин хангамж авдаг юм, ямар боловсрол мэдлэг, хэл устай юм? Хэрэв Засгийн газар үүнд гар дүрсэн юм бол монгол бахархлыг үгүй хийх гэсэн ээлжит оролдлого, наадмаар нанчилдуулах гэсэн явуулга бус уу? Зүй нь Содномдорж тэднийг л янзалмаар байх юм. Энэ дүрмийг зөвшөөрөхгүй гэдгээ нүүр хуудсаараа илэрхийлсэн Батсуурь ч бас тэр нөхөдтэй л халз тулмаар байна. Дүрмийн энэ өөрчлөлт цаашдаа олон сайхан аварга арсланг нэр хүндгүй, нэмнээ нөмөргүй болгож шавхайд хутгана шүү. Олон ч үгүй, олом ч үгүй хоцроход хүргэнэ. Эхний золиос нь Батсуурь, Содномдорж хоёр боллоо. Хоёр сайхан бөх, хоёулаа эрчтэй, хүчтэй. Хоорондоо үзэлцэх хэрэггүй ээ, хооронд нь яс хаяад ярзайтал хэрэлдээд байх шаардлага ч миний ард түмэнд үгүй. Үе үе дүрмээр тоглож, дүрдээ жүжиглэж байдаг МҮБХ-ны тэргүүлэгчидтэйгээ л халз тулж, хар цагаанаа ялгаж авмаар байна! Засаг оролцсон нь үнэн юм бол задартал нь алганы хээ хүртээмээр байна даа." гэсэн юм.
