Зун цагт хотыг өнгө үзэмжтэй харагдахад нөлөөлдөг гол хүчин зүйлсийн нэг бол хотын гудмаар үзэгддэг өнгө алагласан цэцгүүд яах аргагүй мөн. Энэ жил төв талбайг анх удаа ЛИЛИ цэцгээр гоёжээ.
Анхилам үнэрт лили цэцэг нь эмэгтэй хүний зориг тэвчээрийг илэрхийлдэг. Мөн бүх зүйл сэтгэлчлэн бүтэх, аз жаргал хүсэх, эрхэмсэг байдлыг илэрхийлж байдаг аж.
Гэгээн ариун, эрхэмсэг, тансагыг бэлгэддэг лили цэцгийн домог маш олон байдаг. Заримаас нь сонирхуулахад, Германы Harz уулын энгэрт Алис гэх үзэсгэлэнт охин ээжтэйгээ амьдран суудаг байж ээ. Нэгэн өдөр тэрүүгээр өнгөрч явсан Гүнтэн түүнийг олж хараад тэнгэрийн дагина буугаад ирж гэмээр үзэсгэлэнд нь татагдан хамт явахыг хүссэн боловч Алис охин зөвшөөрсөнгүй. Гүнтэн өөрийн хэргэм зэргээ ашиглан юуг ч хийж болно хэмээн хүчээр авч явах гэсэн боловч Алис охин тэнгэр газраас өршөөл хайн орилоход хуй салхи босон Алис охин алга болж байсан газар нь анхилам Лили цэцэг ургасан байж ээ.
