Эмэгтэйчүүдийг Украины дайны бүсэд ажиллуулахаар элсүүлж эхлэв. Омск хотын олон нийтийн сүлжээгээр Батлан хамгаалах яамтай гэрээ байгуулахыг урьсан сурталчилгаа гарчээ. Юуны түрүүнд эмч, эмнэлгийн ажилтан, сувилагч, тогооч нарыг тусгай ажиллагаанд оролцохыг уриалжээ.
"7×7" сэтгүүлч Омскийн цэргийн бүртгэл, комиссын газрын дугаар руу холбогдоход эмэгтэйчүүдийг элсүүлж байгааг баталжээ. 50 хүртэлх насны эмэгтэй хүн гэрээ байгуулж болно. Хугацаа нь дор хаяж нэг жил байх бөгөөд энэ хугацаанд амралт гэж байхгүй. Тавигдах шаардлага хамгийн бага. Тухайлбал, сувилагч, тогооч нар мэргэжлээрээ боловсрол эзэмшсэн байх албагүй.
Эмэгтэйчүүдийг хааш нь явуулах нь тодорхойгүй байна. Гэхдээ тэднийг 2022 оны намар өөртөө нэгтгэсэн Украины Донецк, Луганск, Херсон, Запорожье мужуудыг багтаасан Оросын бүс нутагт алба хаах болно гэж Цэргийн бүртгэлийн газар мэдэгдэв.
Цэргийн бүртгэлийн газраас эмэгтэйчүүдэд хэдэн төгрөгийн цалин олгохыг хэлсэнгүй. Юутай ч тэд зөвхөн эхний сард 100 мянган рубль, дараагийн гурван сард тус бүр 50 мянган рубль авах гэнэ. Энэ нь мужийн захирагчийн тэтгэлэг байх бололтой. Мөн дайчлагдсан эмэгтэйчүүд ерөнхийлөгчийн нэг удаагийн тэтгэмж болох 195 мянган рубль авах юм байна.
Өнгөрөгч 3-р сарын 7-нд ОХУ-ын Батлан хамгаалахын сайд Сергей Шойгу Украинтай хийж буй дайнд 1100 эмэгтэй оролцож байгаа бөгөөд тэдний гуравны нэг нь төрийн одон медаль хүртсэн гэж мэдэгдсэн. Тус улсын Зэвсэгт хүчинд нийт 39 мянга гаруй эмэгтэй алба хааж байгаагийн 5000 орчим нь офицер гэсэн мэдээллийг сайд өгч байв.
Эх сурвалж: Moscowtimes.ru
