УИХ-ын гишүүн Г.Дамдинням "Англи хэл Боловсролын ерөнхий хуулиндаа үлдэж, Монголын бүх хүүхэд тэгш боломжоор хангагдах хамтын шийдэлд хүрлээ" хэмээн сошиал хуудастаа бичсэн. Ингэхдээ УИХ-ын дарга Г.Занданшатар, ЭЗХ-ийн сайд Ч.Хүрэлбаатар нарын хамт зогсож буй зургаа хавсаргажээ.
Үүгээр нийгэмд "Англи хэлийг хуульчилж чадлаа", "Англи хэл үлдлээ" гэх мэт яриа, сэтгэгдэл хөвөрч байна.
Угтаа Боловсролын ерөнхий хуулийн хэлэлцүүлгийг өчигдөр холбогдох Байнгын хороогоор ч, УИХ-ын чуулганаар ч хийгээгүй. Өнгөрсөн долоо хоногт хэлэлцэж, эцсийн хэлэлцүүлэгт нь бэлтгүүлсэн. Өнөөдөр харин УИХ-ын чуулганы хуралдаанаар эцэслэн батлах ёстой.
Тэгэхээр одоогийн байдлаар Сургуулийн өмнөх болон Ерөнхий боловсролын тухай хуульд "...Үндсэн гадаад хэл нь англи хэл байна" биш "...Үндэсний хөтөлбөрт туссан гадаад хэл байна" хэмээн өөрчилсөн хувилбараар бий.
Харин Г.Дамдинням гишүүний бичсэнчлэн, энэ заалтыг анхныхаар нь "...үндсэн гадаад хэл нь англи хэл байна" хэмээн оруулж ирэхээр хамтын ойлголцолд л хүрсэн байж болох юм. Энэ шийдэл УИХ-д өнөөдөр танилцуулагдаж, улмаар гишүүд болон салбарын сайд хэрхэн хүлээж авахаас өрнөл шалтгаална.
