Канад жил бүр дэлхийн дулааралтай холбоотой байгалийн гамшигтай тулгардаг. Өнгөрсөн жил Бритиш Колумби муж үерт автаж, хар салхинд цохиулж байсан бол жилийн өмнө дээд амжилт тогтоосон хэт халалтын улмаас олон зуун хүн амиа алдсан билээ.
Энэ жил ч бас л иймэрхүү байдал давтагдах бололтой. Зун хараахан эхлээгүй байгаа ч Канад улс түүхэндээ хамгийн аймшигтай ой хээрийн түймрийг туулж байна.
Канадын түймрийн утаа хөрш зэргэлдээх АНУ-ыг бүрхэж, бүр Европт хүрчээ. АНУ-ын хойд хэсэгт хүмүүс гэрээсээ гарахгүй байж, утаатай агаараар амьсгалахгүй байхыг зөвлөж байна.
Мөн өмнөд хэсэгт, Аризонагаас Техас, Флорида хүртэл хэдэн арван сая хүн дулааны бөмбөг гэж нэрлэгддэг халуунд шаналж байна. Энэ нь хэдэн долоо хоногийн өмнө бүс нутгийг хамарсан бөгөөд цаг агаарын урьдчилсан мэдээгээр 7-р сарын 4-ний Тусгаар тогтнолын өдөр хүртэл энэ халуун сарнихгүй.
Эрх баригчдын мэдээлснээр, хамгийн багадаа 13 хүн халууны улмаас нас баржээ.
Хөрш Мексикийн хувьд байдал бүр ч дор байна. Тэнд хохирогчдын тоо зуу гаруй болжээ. Тус улсад дөрөвдүгээр сараас хойш гурав дахь удаагаа ийм хүчтэй халуун тохиож байгаа бөгөөд эрх баригчид ийм халуун дахин давтагдахыг анхааруулж байна.
Европийн улс орнуудад байдал бүүр ч таагүй байна. Испанийн өмнөд хэсэгт ган гачиг болж, 6-р сарын эцсээр Севилья, Кордоба мужид агаарын температур + 44 хэм хүртэл өссөн байна. 2011 оноос өмнөх 35 жилийн хугацаанд Испанид зургадугаар сард ердөө тавхан удаа хүчтэй халж байсныг цаг уурчид тэмдэглэж байна. Гэтэл сүүлийн 12 жилийн хугацаанд зургадугаар сард ийм хэт харуун зургаан удаа бүртгэгдлээ.
Их Британид 6-р сар түүхэн дэх хамгийн халуун сар байсан гэж урьдчилсан хэмжилтээр дүгнэжээ. Өнгөрсөн жилийнх шиг дөчин градусын халуун бүртгэгдээгүй ч темпратур 32 хэмээс дээш гарсангүй. Гэсэн хэдий ч шөнөдөө дулаахан, хур тунадас бараг ороогүй, өнгөрсөн долоо хоногт огцом хүйтэрсэн ч 2023 оны 6-р сар 1940, 1976 оны дулааны дээд амжилтыг эвдэхэд саад болсонгүй.
Германд тээврийн гол судас болох Рейн мөрөн хугацаанаасаа өмнө ширгэж эхэлжээ.
Ази тивд Пакистанаас Малайз хүртэл олон тэрбум хүн хэт халуунд шаналж байна.
Хятадын нийслэл Бээжин хот 10 хоногийн турш халууны давалгаанд хоёр ч удаа өртсөн бөгөөд 40 градусын халуун гурван өдөр дараалан үргэлжилсэн нь 1951 оноос хойш анх удаагийнх юм. 35 хэмээс дээш халсан өдрийн тоо сүүлийн 30 жилийн зургадугаар сарын дунджаас давжээ.
Энэтхэгт бүр халуун байна. Тус улсын хойд болон зүүн хэсэгт 6-р сард термометрын заалт +46 хэмд ойртсон. Эрх баригчид халуунаас болж нас барсан олон арван хүний хэргийг шалгаж байна. Халуунаас болж хүмүүс үхэж байна гэсэн "хариуцлагагүй мэдэгдэл" хийснийх нь төлөө бүс нутгийн эмнэлгийн ахлах эмчийг ажлаас нь халсан байна.
Саудын Арабт хаж мөргөл 2023 оны зургадугаар сард тохиов. Өдрийн цагаар +48 хэм байсан Саудын Арабын ариун газруудад олон зуун мянган лалын шашинтнууд иржээ. Олон зуун хүн тэнд үүрд үлдсэн байна. 2000 гаруй хүн халуунд нэрвэгдэж, 230 гаруй хүн нас барсан гэж эрх баригчид мэдэгдэв.
