Аюулгүй байдлын албаныхан генерал Сергей Суровикин төдийгүй Батлан хамгаалахын сайд Сергей Шойгугийн хамгийн ойрын хүмүүсийг шалгасан гэж Bloomberg бичжээ. Энэхүү шалгалт шахалт Пригожины бослогын дараа эхэлсэн гэж нөхцөл байдлын талаар сайн мэддэг эх сурвалжаас иш татан мэдээлэв.
Гэхдээ одоогоор Шойгу болон Жанжин штабын дарга Валерий Герасимов нарын албан тушаалыг хөндөж мэдэх өөрчлөлтүүдийг барууны албаныхан таамаглаагүй байна. Путин хамтран ажиллагсдаа халахыг хүсэхгүй байна гэж Bloomberg тэмдэглэжээ.
Генерал Суровикиныг баривчилсан гэж БХЯ-ны аппаратад ойр байдаг The Moscow Times сонины эх сурвалж өмнө нь мэдээлсэн. Энэ мэдээлэл албан ёсоор батлагдаагүй байна. Генералыг хаана байгаа талаар юу ч мэдэгдээгүй байна.
Цэргийн прокурорын газрын төлөөлөгчид сүүлийн өдрүүдэд генерал Сергей Суровикиныг Пригожинтэй ямар холбоотой байсан талаар байцааж байна гэж Bloomberg нөхцөл байдлын талаар сайн мэдэх эх сурвалжаас иш татан бичжээ. Тус агентлагийн мэдээлснээр түүнийг нэг газар хорьж байгаа ч шоронд биш гэжээ.
"Вагнер" Ростов дахь цэргийн байгууламжуудыг хялбархан эзэлж чадсан нь уг хуйвалдаанд армийн зарим командлагч оролцсон байж магадгүй гэж үзэхэд хүргэж байгаа гэж барууны тагнуулын мэдээлснийг The Wall Street Journal иш татжээ. Пригожин Украин дахь бүлгийн командлагчийн орлогч Суровикинтай санал бодлоо хуваалцсан байж магадгүй гэж үзэж байна. Тэр Пригожинийн төлөвлөгөөний талаарх мэдээллийг Холбооны Аюулгүй байдлын албанд дамжуулсан эсэх, тусгай алба үүнийг хэрхэн олж мэдсэн нь тодорхойгүй байна.
АНУ-ын албаны хүмүүсийн хэлснээр, одоо америкчууд бослогыг төлөвлөхөд Суровикин тусалсан эсэхийг тогтоохоор оролдож байна.
"The Wall Street Journal" сонинд бичсэнээр Вагнерийн тэргүүн Шойгу, Герасимов нарыг баривчлахаар төлөвлөж байжээ.
Эх сухвалж: Moscowtimes.ru
