Өнөөдрөөс эхлэн 490 орчим мянган тэтгэвэр авагчдын тэтгэвэрт өөрчлөлт орж байна. Тодруулбал, ижил ажил мэргэжлээр ойролцоо хугацаанд ажиллаж, шимтгэл төлсөн боловч тэтгэвэр тогтоолгосон оноосоо хамаараад зөрүүтэй тэтгэвэр авч байгааг ойртуулж, тэтгэврийг итгэлцүүрээр нэмэгдүүлсэн юм. Үүнээс гадна нийт тэтгэврийн доод хэмжээ 500 мянган төгрөг байсныг 550 мянган төгрөг болгож 10 хувиар нэмж байгаа юм.
Итгэлцүүрээр Монгол Улсын нийт 481,000 тэтгэвэр авагчдын 165,000-ынх нь нэмэгдэнэ.
Итгэлцүүрээр тэтгэвэр нэмэгдэхгүй хүмүүс:
- Архиваас 161,000 хүний цалин тэтгэврийн мэдээлэл олдохгүй байгаа.
- Сайн дураараа нийгмийн даатгалын шимтгэлийг бага хэмжээгээр төлсөн хүмүүс
- Ажилласан жилийнхээ тэтгэврийн даатгалын шимтгэлийг нөхөж төлсөн 608,000 хүн. Энэ хүрээнд 38 тэрбум төгрөг төлсөн ч одоо хоёр их наяд төгрөгийг тэтгэвэр болгоод авсан.
- Эдийн засгийн ил тод байдлын тухай хуулийг 2015 онд батлагдсан. Энэ хуулийн дагуу тэтгэврийн даатгалын шимтгэлээ нөхөн төлж, тэтгэврээ тогтоолгосон хүн.
- Малчин, хувиараа хөдөлмөр эрхлэгчдийн тэтгэврийн даатгалын шимтгэлийг нөхөж төлөн тэтгэврээ тогтоолгосон бол итгэлцүүрээр нэмэгдэхгүй.
Тэтгэврийг 10% нэмэхээр 400 орчим тэрбум төгрөгийг төсвийн тодотголд оруулж байна. Хувь тэнцүүлсэн тэтгэвэр 10% нэмэгдэнэ. Хувь тэнцүүлсэн болон бүрэн тэтгэвэр авдаггүй 6,000 орчим хүн бий. Эдгээр хүний халамжийн тэтгэмж нэмэгдэнэ.Сангийн сайд Б.Жавхлан: "Өмнөх тэтгэврийн нэмэгдлээр дунд болон доод хэмжээнд тэтгэвэр авч байсан хүмүүс адилхан тэтгэвэртэй болсон. Үүнийг итгэлцүүрээр тооцвол эргээд ялгаатай болно. Тухайн хүний цалингийн хэмжээнээс хамаараад дунд хэмжээнд тэтгэвэр авч байсан хүмүүсийн тэтгэврийн хэмжээ 600-650 мянга орчим, харин 350 мянга байж байгаад шууд 500 мянга болсон иргэдийн тэтгэвэр 550 мянга болоод явна. 2022 оны хоёрдугаар сарын тэтгэврийн нэмэгдлээс хойш тэтгэвэр авсан хүмүүс нэмэгдэлд хамрагдаж амжаагүй. Тэгвэл энэ удаад нөхөж нэмэгдэнэ гэсэн үг"
ХНХ-ын сайд Булгантуяа: "Тэтгэврийн итгэлцүүрийг шинэчлэн батална. Тэтгэврийн итгэлцүүр гэдэг нь өмнөх үеийн цалингийн хэмжээг одоогийн цалингийн хэмжээнд шилжүүлэх үзүүлэлт. Өөрөөр хэлбэл, 1990 онд 500 мянган төгрөгийн цалин авч байсан хүний цалин өнөөдрийн байдлаар нэг сая гаруй төгрөг болсон гэсэн үг юм. Тэтгэвэр бодохдоо хамгийн өндөр цалин авсан таван жилийг авч үздэг. Ингээд итгэлцүүрээр нь үржүүлээд тавд хуваан 45 хувиар нь тэтгэвэр тогтоодог байна. Одоо бол 2014 оныхоор боддог учраас 2014 оны инфляц, цалингаар тооцдог гэсэн үг. Итгэлцүүрийг жил бүр шинэчлэн батлах ёстой атал манайд хамгийн сүүлд 2014 онд шинэчилсэн юм байна. Даатгалаа нөхөж төлөөд тэтгэвэр тогтоолгосон хүмүүс бий. Энэ хүмүүсийн тэтгэвэр итгэлцүүрээр төдийлөн нэмэгдэхгүй байхаар байна. Удахгүй яамны сайт дээр тэтгэвэр хэрхэн нэмэгдэхээ тооцож үзэх хэсгийг байршуулна. Ахмадууд өөрсдөө ороод тэтгэврээ тооцох боломжтой" гэсэн юм.
