“MСS”-ийн Б.Оджаргал захиралд хаяглав

Яагаад түүнд хаяглах болов оо гэж үү…?

Яагаад гэвэл “MСS”-ийн Б.Оджаргал захирлын дор ажилладаг нөхөд энэ компанийн нэр хүндийг унагаж байгаа учраас түүнд “АЛТАН ХОШУУ” буюу үнэнийг өчиж буй хэрэг.

Үнэндээ “MSС”-ээр овоглосон, тэндээс хоногийн хоол өдрийн талхныхаа мөнгийг авдаг нөхдүүд компанийнхаа нэр хүндийг бодолгүй, хар амиа хоохойлж байгаа учраас ийнхүү хэлэхэд хүрэв. Тэд үнэндээ хүн чанар, хүнлэг сэтгэл гаргахгүй, амьдрал нь дөнгж цэцэглэж явсан залуугийн эрүүл мэндээр наадчихаад эцэст нь үл тоож бултах арга саам хэрэглэж өдөр хоногийг аргацаан өнгөрөөж байна.

Сурвалжлагаар очсон багийнхныг хараад салгаж чичирч байгаа гараа өргөн шүд зуусаар толгой дээрээ аваачаад “ХАЙРТАЙ” гэж дохиочилж байгаа тэр залууг хараад үнэндээ өр өвдсөн. Тийн байхыг нь харсан үртэй үндэстэй үр хүүхэд, ач зээтэй хэний ч гол горойж зүрх сэтгэл нь эмзэглэнэ.

Өдгөө 23 настай залуу ямар их итгэлтэйгээр бидэнд юу чадаж байгаагаа үзүүлж байсан нь одоо ч нүдэнд харагдаж байна. Тийнхүү “өдрөөс өдөрт сайжирч байгаа шүү” гэдгээ бидэнд үзүүлж буй түүний харцанд “МСS-ийн бүр том даргад нь намайг эдгээгээд өгөөч, охиноо дагуулаад гадуур алхмаар байна гэж хэлээд өгөөч. Намайг бүрэн эдгэрэхэд минь туслаад өгөөч гэж гуйж байна...” гээд дамжуулаад өгөөч гэсэн гуйлт, бас эдгэрэх маш их хүсэл байгаа нь илт байсан.

Амьдралыг нь авч явсан САЙН ХҮҮ нь хамгаалалтын дуулга өгөөгүй ажилтны буруугаас гулгаж байгаад унаж тархи нугасандаа хүнд бэртэж 3 жид хэвтэж байгаа нэгэн айлын чин хүсэл ч бас энэ захидалд хамт буй.

Ж.Оджаргал захирлаа, товчхондоо бол танай охин компани болох “Скай, Ресорт”-ын буруутай үйл ажиллагаанаас болж өнөөдөр нэгэн сайхан залуу хэвтрийн болж, ар гэр амьдрал нь орвонгоороо эргэж, хүүгээ хэвтүүлсэн гац төмөр ор, гал тогооны шүүгээнээс өөр зүйлгүй болтлоо тэр айл ЯДУУРЧ, улныхны эгнээ рүү орж явна.

Хэрэв таны сонорт энэ асуудал эрт хүрсэн бол өдийд 23 настай тэр залуу эдгэрчихсэн, охиноо хөтлөөд алхаж яваа.

Эл хэргийн шүүх хурал саяхан болсон ч бас л хойшилж ирэх сарын 21-нд товлогдсон.

Уг нь энэ хэрэг эрүүгийн хэрэг байсан бөгөөд танай охин компани “Скай, Ресорт”-ынхон “Эмчилгээний зардлыг нь төлнө, бусад бүх зардлыг нь ч бүрэн барагдуулна...” гэж шүүхий өмнө ам өгч байж Өршөөлийн хуульд хамрагдсан. Гэтэл Өршөөлийн хуульд харагдсаныхаа дараа зангаа хувиргаж, залуугийн эрүүл мэндийг юман чинээ бодохгүйгээр үл барам бүр доог тохуу хийж “Зардал мөнгийг чинь төлөхгүй, заргалдаад ч авч чадахгүй гэх өнгө аясыг илт илэрхийлж өмгөөлөгчийнхөө тоог 4, 5-аар нэмчхээд ядарсан нэгэн гэр бүлийг ДЭЭРЭЛХЭЖ, ТОХУУРХАЖ байна.

Нийгэм таныг үнэлдэг. Таны амьдрал, таны хэн бэ гэдэг нь олны нүдний өмнө ил байдаг. Тийм дээ ч Монголын жудаг сайтай, хүн чанартай эрчүүдийн нэг” гэдэг ч биз.

Тиймээс та энэ асуудалд анхаарлаа хандуулж нэг дуугарна,байгаа.