Ирэх сарын 1-нээс ахмадуудын тэтгэвэр болон тэтгэмжийг нэмэх Засгийн газар шийдвэр гарсан. Энэ талаар ХНХЯ-наас мэдээлэл өглөө. Энэ үеэр Нийгмийн даатгалын ерөнхий газрын даргын үүргийг түр орлон гүйцэтгэгч Ц.Ганцэцэг тэтгэвэр бодох цалингийн итгэлцүүрийг тооцох талаар мэдээлэл өгөв. Тэрбээр "Нийгмийн даатгалын сангаас тэтгэвэр авч байгаа, 6 дугаар сард шинээр тэтгэвэр авах нийтдээ 496 мянган хүний тэтгэврийг цалинд хэрэглэх итгэлцүүрээр шинэчлэн бодох шийдвэр Засгийн газрын тогтоолоор гарсан.
Энэ дагуу бид нийт 496 мянган ахмадын тэтгэврийг шинэ итгэлцүүрийн дагуу бодож тогтоолоо. Нэг ажил мэргэжлээр, ижил хугацаанд ажилласан хүмүүсийн тэтгэвэр хэзээ тогтоолгосноос хамаарч өөр өөр байдаг. Тухайн үед буюу тэтгэвэр тогтоолгоход цалин нь ямар байснаас хамаарч өөр өөр тэтгэвэр авдаг байв. Цаашид энэ ялгааг арилгана. Багш тэтгэврээ тогтоолгоход одоо багш нарын цалин ямар хэмжээтэй байгаатай уялдуулдаг болно." гэлээ.
Та бүхэн тэтгэврийн зөрүү, итгэлцүүрийн талаарх мэдээлэлтэй танилцана уу.
