Ирэх сарын 1-нээс ахмадуудын тэтгэвэр болон тэтгэмжийг нэмэх Засгийн газар шийдвэр гарсан. Энэ талаар ХНХЯ-наас мэдээлэл өгч байна.
Төрийн нарийн бичгийн даргын албан үүргийг түр орлон гүйцэтгэгч А.Хишигбаяр "Цэргийн алба хаагчийн тэтгэврийн нэмэгдлийг 7 дугаар сарын 1 нээс нэмэгдүүлнэ. Тэтгэвэр бодох цалингийн итгэлцүүрийг шинэчилж Засгийн газрын тогтоолоор батлуулсан. 1995 оноос 6 удаа шинэчилж байсан.
Энэ итгэлцүүрээр эхлээд тэтгэвэр авагчдын тэтгэврийг өөрчлөн тогтоож дараа нь тэтгэврийн хэмжээг 10 хувиар нэмэгдүүлнэ. Ингэснээр тэтгэврийн доод хэмжээ 500 мянга байсан бол 550 мянган төгрөг болно. Хувь тэнцүүлсэн тэтгэврийн доод хэмжээ 400 мянга байгаа бол 440 мянган төгрөг болно. Дундаж тэтгэвэр 555 мянган төгрөгөөс 630 мянган төгрөг хүрнэ гэсэн тооцоо бий.
Нийгмийн халамжийн сангаас олгож байгаа тэтгэврийн хэмжээг нэмэгдүүлсэн. Тэтгэврийн хэмжээ 285 мянган төгрөг байгааг 325 мянган төгрөг болгосон. Энэ тэтгэврийн хэмжээгээр байнгын асаргаа шаардлагатай хүүхдэд олгодог мөнгөн тэтгэмжийн хэмжээг халамжийн тэтгэвэртэй адилхан хэмжээгээр олгодог. Энэ тэтгэмж бас 325 мянган төгрөг болгож нэмэгдсэн. Байнгын асаргаа шаардлагатай хүүхдээ асарч байгаа эцэг, эхэд 123.100, насанд хүрсэн хөгжлийн бэрхшээлтэй хүн асарч байгаа хүнд 84.500 төгрөг олгодог байсан. Энэ ялгаатай байдлыг арилгаж 7 дугаар сарын 1 нээс 275 мянган төгрөг болгож нэмэгдүүлсэн. Эдгээр тэтгэмжийг наадмын өмнө олгоно." гэлээ.
