Учир битүүлгээр амиа алдсан эмч Г.Ганжаргалын ар гэрийнхэн ХЗДХ-ийн сайд Х.Нямбаатарт хандаж цагдаа, прокурор, Шүүх шинжилгээний алба хаагчид тангарагтаа үнэнч байж, хуулийн хүрээнд шударга ажиллаж талийгаачийн үхлийн шалтгааныг тогтоон өгөхийг шаардан мэдээлэл хийж байна.
Талийгаач Г.Ганжаргалын багын найз н.Энхжаргал: 2022 оны долоодугаар сарын 8-ны өдөр эмч Г.Ганжаргал Архангай аймгийн "Хасу шивэрт" амралтын газарт амь насаа алдсан. Хуулийн байгуулагуудын ажлаа хийж байгаа байдал, асуудалд хандаж байгаа өнцөг биднийг эргэлзэхэд хүргэж байгаа учраас өнөөдрийн хурлыг хийж байна. Өндрөөс унасан мэдээ болгон ахуйн осол, санамсар болгоомгүй байдлаас болсон гэж хаагдаж байна. Жишээлбэл Төрийн ордонд улс төрч хүн өндрөөс унаж амь насаа алдсан.
Анх цагдаагийн байгууллагад ирсэн дуудлагад өндрөөс унаж хүн амь насаа алдлаа гэсэн байсан. Гэтэл харсан гэрч байдаггүй. Дуудлага дуудсаны дараа цагдаа хоцорч ирсэн. Хамт явсан хүмүүст нь 3 цагийн дараа мэдэгдсэн. Тэдэнд хэлэхдээ шууд дүгнэлт хийгээд өндрөөс унасан гэж хэлсэн.
Талийгаач доош харсан байдалтай газар хэвтчихсэн, байшингийн тагт нээлттэй байгааг хараад л өндрөөс унасан байна гэсэн дүгнэлт гаргасан
Талийгаач Г.Ганжаргалын үеэл дүү О.Гал-Очир: Хэргийн газрын үзлэгийг мөрдөгч шинжээч нар маш дутуу хийсэн. Өрөөний хурууны хээний бэхжүүлэлтийг хийгээгүй. Өрөөнд байсан хүмүүсийн хурууны хээг авсан хэрнээ талийгаач ахын минь хурууны хээг аваагүй. Талийгаач ахын хурууны хээг аваагүй талаар хэвлэлд ярьсны дараа Архангай аймгийн мөрдөгч "Ахын чинь хурууны хээг авчихсан юм байна аа. Хэрэгт хавсаргаж амжаагүй юм байна" гэсэн. Хэрэг нь Улаанбаатар хотод шилжээд ирсний дараа хурууны хээ нь араас нь ирсэн. Ингэж хэргийг сүүлд нь өөрчилж болдог юм уу? Амьсгал боогдсон ул мөр байхад бусад эд эрхтэнд яаж нөлөөлдөг шинжилгээг дутуу хийсэн. Дахин шинжилгээ хийнэ гэж байгаа. Аль хэдийн оршуулсан учраас ясанд шинжилгээ хийх хэрэг гарна. Тэгэхээр үнэн зөв дүгнэлт гаргахад хэцүү гэж бодож байна. Хувцсанд нь үзлэг шинжилгээ огт хийгээгүй. Бидэнд торонд хийгээд өгчихсөн. Талийгаач доош харсан байдалтай газар хэвтчихсэн, байшингийн тагт нээлттэй байгааг хараад л өндрөөс унасан байна гэсэн дүгнэлт гаргасан. Өөр хүнтэй маргалдсан, ноцолдсон, муудалцсан эсэхийг шалгаагүй. Хамт явсан хүмүүсийн биед үзлэг хийгээгүй.
Нөхөрт минь хийсэн анхан болон давтан шинжилгээнүүд нь хоорондоо эрс зөрүүтэй, шинжлэх ухааны үндэслэлгүй байна гэж үзээд дахин шинжилгээ хийхээр болсон
Талийгаач Г.Ганжаргалын эхнэр А.Отгонцэцэг: Нөхөрт минь хоёр удаа задлан шинжилгээ хийсэн. Одоо гурав дахь удаагаа хийхээр тогтоол нь гарсан. Анхан болон давтан шинжилгээнүүд нь хоорондоо эрс зөрүүтэй, шинжлэх ухааны үндэслэлгүй байна гэж үзээд УЕП-оос дахин шинжилгээ хийх үндэслэл байна гээд Эрүүл мэндийн салбар зөвлөлөөс тусгай мэргэжил салбарын хүмүүсийг оролцуулаад дахин шинжилгээ хийхээр болсон. Энэ шинжилгээнд гэмтлийн чиглэл бүрийн эмч нарыг оролцуулж өгөөч гэж хүсэж байна. Гавал тархи, хүзүү нуруу, цээжний мэс заслын эмч нарыг оруулж өгөөч гэж хүсэж байна. Яагаад ингэж байна гэхээр 4 давхар буюу 11 давхраас доошоо шаталсан уналт гэж ярьж байгаа юм. 2 давхрын тагтны хүрээ модонд цохигдоод унахдаа доор байрлах цахилгаан үүсгэвэр генератарийн дээвэрт цохигдохгүйгээр яаж 260 см хол шидэгдэж унасан юм бэ. Шинжлэх ухааны хувьд боломжтой зүйл юм уу нотлоод өгөөч гэж хүсэлтийг гаргасан. Өндрөөс унасан гэсэн хэрнээ дотор эрхтэн нь зүгээр, гавлын яс нь хоёр хуваагдаж, хоолойд нь боосон мэт хөхрөлт үүссэн байсан байхад гадны нөлөөгүй гэсэн шинжээчийн дүгнэлтийг үндэслэлгүй гэж үзэж байна. Хэрэг удаашралтай шийдэгдэхгүй байна.
