СБД-ийн 19 дүгээр хороо Санзайн аманд 21 мянган га газрыг гадаадын иргэнд эзэмшүүлсэн гэх асуудлаар Сүхбаатар дүүргийн Тамгын газраас мэдээлэл хийлээ.
СБД-ийн ЗДТГ-ын Төрийн захиргааны удирдлагын хэлтсийн дарга В.Гомбодорж "СБД-ийн 19 дүгээр хороо Санзайн аманд 21 мянган га газрыг гадаадын иргэнд эзэмшүүлсэн нь зөв үү буруу юу гэж иргэн Б сошиал орчинд мэдээлсэн. Энэ асуудалд тайлбар хэлэхэд 2011 онд буюу 12 жилийн өмнө дүүргийн Засаг даргын захирамжаар "ФСУБ" гэдэг компанид зуслан болон спортын талбайн зориулалтаар энэ газрыг 5 жилийн хугацаатай ашиглуулахаар эзэмшүүлсэн. Мөн тухайн ондоо Нийслэлийн Засаг даргын захирамжаар "ФСУБ" ХХК нь "Инскрешсорос" ХХК-ийг хамтран эзэмшигчээр нэмүүлсэн. Үүнээс хойш нийтдээ гурван удаагийн Нийслэлийн Засаг даргын захирамжаар 5, 5 жилийн хугацаатайгаар сунгасан. Хамгийн сүүлд буюу 2022 оны 4 сарын 26-ны өдөр ашиглах хугацааг сунгасан байна.
Мэдээлэл гарсны дараа Сүхбаатар дүүргийн Газар зохион байгуулалтын албанаас үзлэг шалгалт хийсэн. Тухайн газар нь Санзайн лагерын орчим, ой модны захаар олгосон 21 мянган га газар байна лээ. Одоогоор ямар нэгэн хашаа хайш, барилга байгууламж бариагүй. Бут, сөх, мод эвдэлж сүйтгэсэн асуудал одоогоор гараагүй байна. Газрын тухай хуульд гадаадын хөрөнгө оруулалттай компани тодорхой хугацаа, зориулалтаар газар ашиглах эрхтэй байдаг. Тодруулбал, эзэмшихгүй, зөвхөн ашиглана. Энэ ашиглалт нь хууль зөрчсөн асуудал байгаа эсэхийг бид мэдэхгүй байна.
Мөн тухайн иргэний мэдээлэлд дурдагдсан Сүхбаатар дүүргийн 20 дугаар хороонд Сэлбийн зуслангийн 8 айлын газар, ой мод устгаж газар тэгшилсэн байна гэсэн. Тухайн газрын мөн 12 жилийн өмнө Дүүргийн засаг даргын захирамжаар зуслангийн болон гэр бүлийн хэрэгцээний зориулалтаад эзэмшүүлсэн байна. Тухайн газар дээр бут сөөгийг гэмтээж газар тэгшилсэн асуудал үүссэн учраас холбогдох байгууллагуудад хандсан. Тухайн байгууллагууд хуулийн дагуу арга хэмжээ авах байх.
Сэлбийн зуслангийн хэсэгт ойд хундаам ухаж модыг гэмтээж, газар сүйтгэсэн талаар тухайн иргэний мэдээлэлд гарсан. Тухайн иргэний лайваас өмнө энэ асуудалд Нийслэлийн байгаль орчны газраас 2023 оны 6 дугаар сарын 16-нд албан шаардлага өгч газар дээр нь хяналт тавьж ажилласан. Ингэхэд ямар нэгэн зөвшөөрөлгүйгээр газар сүйтгэж мод бут тайрч байшингийн хундаам цутгаж байгаа асуудал гарсан. Үүнд мөн буруутай этгээдэд хуулийн дагуу хариуцлага хүлээлгэнэ. " гэлээ.
