Нүүрсний 40 их наядын хулгайг хэд хэдэн төрлөөр хийсэн байдаг. Тухайлбал, нүүрсний жин, ангилал, хоосон машин хилээр гаргах, оффтек гэрээ, төмөр зам барих гэх мэт олон төрлөөр нүүрсний хулгайг хийсэн нь олон нийтэд ил болоод байгаа. Тэгвэл УИХ-аас байгуулсан хянан шалгах түр хорооны ажлын явцын тайланг хэлэлцэх үеэр хэд хэдэн ноцтой зөрчил илэрснийг түр хорооны дарга Г.Ганболд гишүүн хэлсэн.
Тухайлбал, Зүүнбаян чиглэлийн төмөр замын ажлыг удирдан зохион байгуулах үүрэг бүхий ажлын хэсгийг Ерөнхийлөгч асан Х.Баттулга ахлан ажиллаж байсан бөгөөд ажлын хэсэг Ерөнхийлөгчийн өрөөнд хуралддаг байсан нь хурлын тэмдэглэлээр батлагдсан байна. Энэ талаар түр хорооны дарга Г.Ганболд хэлэхдээ “Зүүнбаян төмөр замын ажлын хэсгийн хуралдаан тухайн үеийн Ерөнхийлөгчийн албан өрөөнд явж байсан тэмдэглэлүүд байгаа. Энэ бол нэг газраас төслийг удирдаж байсны нэг илрэл” гэсэн юм.
Гэтэл одоо болтол тус төмөр зам барих гэрээг өнөөдрийг болтол монгол хэл дээр орчуулаагүй, англи хэлээр байгаа учраас монголын шинжээчид хяналт, шалгалт хийхэд хүндрэлтэй байгаа гэдгийг түр хорооны дарга хэлсэн.
“Тавантолгой-Зүүнбаян чиглэлийн төмөр зам” нь Монгол Улсын стандартаар 3 дугаар зэрэглэлийн зам бөгөөд гол замын урт 416.1 км, дэлгэмэл урт нь 486.6 км. Төслийн нийт өртөг 1,392.2 тэрбум төгрөг буюу 488.5 сая ам.долларыг Эрдэнэс таван толгой ХК-иас мөнгөн хөрөнгөөр санхүүжүүлсэн нь компанийн санхүүгийн байдал болон 1072 хувьцааны ногдол ашиг хуваарилах боломжид сөргөөр нөлөөлсөн хэмээн дүгнэжээ.
