Үндэсний их баяр наадмыг зохион байгуулах хорооны Үндэсний бөхийн салбар хорооноос мэдээлэл хийлээ. Тус хороо нь бөхчүүдийг идэвхгүй удаан барилдсан тохиолдолд хасах шийдвэр гаргаад байгаа юм. Энэ талаар Үндэсний бөхийн салбар хорооны дарга, Хууль зүй, дотоод хэргийн яамны төрийн нарийн бичгийн дарга П.Сайнзориг тайлбарлалаа.
Тэрбээр "Ардын хувьсгалын 100, 101 жилийн ойн баяр наадмын бөхийн барилдааныг шинэ дүрмээр зохион байгуулсан. Идэвхийг нь харж хасах дүрэм. Ямар нэгэн асуудал, маргаан гараагүй. Харин энэ удаад Монголын үндэсний бөхийн холбооноос албан бичиг ирүүлж идэвхээр хасах дүрмийг хасаж өгөхийг хүссэн. Гэвч үүнийг бөхчүүдээрээ хэлэлцүүлээгүй байсан. Гэхдээ саналыг нь манай салбар хороо хэлэлцсэн. Хуралд оролцсон 15 хүний 12 нь дүрмийг өөрчлөх шаардлагагүй гэж үзсэн. Харин ганцхан л өөрчлөлт оруулж байгаа. Түрүү жил үндсэн барилдаан 30 минут, нэмээд идэвх харах барилдаан 10 минут байсан. Үүнийг өөрчлөөд үндсэн барилдааныг 40 минут болгож энэ хугацааны идэвхийг харахаар болж байгаа.
Бөхчүүд ам авах процесстой холбоотойгоор гомдол гаргадаг. Тухайлбал, ямар бөхчүүд байгааг хүнээр уншуулаад сонсохоор зарим бөхийг алгасаад уншчихдаг юм байна. Тиймэс энэ жилээс эхлээд бөхчүүд өөрсдөө дэлгэцэнд гарах бөхчүүдийн зурагтай нэрийг харж ам авна. Энэ процессыг цэнгэлдэхэд байрлуулсан том дэлгэцтэй холбоно. Ам авахдаа утас хэрэглэхийг хориглож байгаа. Таван минутад багтаж ам авах ёстой. Энэ хугацаандаа ам авч амжихгүй бол ухарч, дараагийнхаа хоёр бөхийн дараа ам авна. Олон нийтийн зүгээс бөхчүүдийг хэн нэгний шийдвэрийг хүлээгээд ам авахгүй уддаг гэсэн шүүмжилдэг. Тиймээс ингэж цагтай болгож байгаа юм.
Төрийн наадам цаг хугацаатай байх ёстой. Тиймээс бөхчүүд цолоо дуудуулахдаа нутаг ус, харьяалагдах спорт хорооноос ганцхан л ивээн тэтгэгч компани дуудах нь зүйтэй гэж үзсэн. Зарим бөх 3-4 компанийн нэр дуудуулдаг. Гэхдээ энэ бүх шийдвэр Засгийн газрын хуралдаанаар орж эцэслэн батлагдана.
Ер нь нэр бүхий хэдэн бөхчүүдэд зориулж дүрмийг жил бүр өөрчлөөд байж болохгүй. Том цолтой бөх нь өөрөө дүрмийн зөвлөлд ороод идэвх гэдгийг өөрчилье гэж яриад явж байгаа нь өөрөө ёс зүй, эрх ашгийн зөрчилтэй асуудал болно шүү гэдгийг анхааруулъя. Миний мэдэхээр дүрмийн зөвлөлд Н.Батсуурь, О.Хангай, О.Балжинням аваргууд бий. Мэдээж шүүмжилж болно, гэхдээ батлагдсан дүрмийг дагаж мөрдөх ёстой. Одоо нэг л өөрчлөлтийг Засгийн газрын хуралдаанд танилцуулна. Түрүү жил үндсэн барилдаан 30 минут нэмэх нь 10 минутын барилдааны идэвхийг харж байсан бол энэ жил үндсэн барилдааныг 40 минут болгож тэр хугацааны идэвхийг харна. Ийм байдлаар бөхчүүдийн барилдааныг шүүнэ" гэлээ.
