Америкийн Дайн Судлалын Хүрээлэн (ISW) өдөр тутмын тайландаа Орост бослого гаргах оролдлогын үр дагавар болон түүнийг зогсоохын тулд Лукашенкогийн тусламжтайгаар байгуулсан тохиролцоонд дүн шинжилгээ хийжээ.
ISW-ийн мэргэжилтнүүд хэлэхдээ, 6-р сарын 24-ний үд дунд Вагнерийн дайчид Ростов-на-Дону хотоос хойд зүг рүү хөдөлж Москва руу чиглэж байх үед Пригожин Кремлийн засаг захиргаатай холбогдохыг оролдсон боловч Путин түүнтэй ярихаас татгалзсан гэсэн мэдээллийг иш татав.
Пригожин түүний үйлдлийг өргөнөөр дэмжихгүй байгааг олж мэдээд хувийн цэрэгжсэн байгууллагынхаа хэтийн төлөвийн талаарх бодлоо өөрчилж, Лукашенкотай хэлэлцээрийн ширээний ард суусан. Хэлэлцэрт ОХУ-ын Ерөнхийлөгчийн Тамгын газрын дарга Антон Вайно, Беларусьт суугаа ОХУ-ын Элчин сайд Борис Грызлов нар оролцжээ.
Вагнерын зэвсэгт бослогын үр дагавар, Кремль болон Оросын Батлан хамгаалах яам Вагнерын бие бүрэлдэхүүнийг хэрхэх гэж байгаа, хөлсний цэргийн дайчидтай цаашид хамтран ажиллах эсэх нь бүрэн тодорхойгүй байна.
Үйл явдлын өрнөлөөс харахад Вагнерчууд цэргийн техник хэрэгсэлтэйгээ бэлтгэлийн бааздаа буцаж байгаа нь тус компанийн удирдлага, зохион байгуулалтын ирээдүйн хувь заяа тодорхойгүй байгаа ч Кремль хувийн цэргийн компанийн хүн хүчний зарим хэсгийг хэвээр үлдээх бодолтой байгааг харуулж байна.
Түүнчлэн энэ бослогоос үүдэн ОХУ-ын Батлан хамгаалах яамны удирдлагад ямар нэгэн өөрчлөлт, үр дагавар гарах эсэх нь тодорхойгүй хэвээр байна. Оросын зарим эх сурвалжууд Шойгугийн оронд Тула мужийн захирагч Алексей Дюминг Батлан хамгаалахын сайдаар сольж магадгүй гэж үзэж байгаа ч ISW эдгээр саналыг баталж чадахгүй байна.
Дюмин дэд сайдын албан тушаалдаа эргэн ирж, дараа нь Шойгуг орлож Батлан хамгаалахын сайд болж магадгүй гэж Оросын эх сурвалжууд мэдээлж байна.
Дашрамд тодотгоход, Вагнер-ийн эзэн Евгений Пригожин бослого гаргасны дараа ОХУ-ын Батлан хамгаалахын сайд Сергей Шойгу, Жанжин штабын дарга Валерий Герасимов нар албан тушаалаа алдаж магадгүй гэсэн яриа Орост гарчээ.
Олон тооны эх сурвалжууд БХ-ын сайд Шойгуг Алексей Дюмин, Жанжин штабын дарга Герасимовыг Сергей Суровикиноор сольж магадгүй гэсэн таамаглалыг идэвхтэй тарааж байна.
Гэвч ОХУ-ын БХЯ-ны удирдлагад ямар нэгэн өөрчлөлт гаргах нь Украин дахь Оросын олон арван мянган цэргүүдийн үхэлд Шойгу болон Оросын жанжин штабын дарга Герасимов нарыг шууд буруутгаж бослогоо зөвтгөсөн Пригожинд чухал ялалт байх болно мэргэжилтнүүд хэлж байна.
Оросын БХЯ-ны сайд болж магадгүй гэгдэж буй Алексей Дюмин гэж хэн бэ
Эдүгээ Тула мужийн захирагчаар ажиллаж буй Алексей Дюмин угаасаа цэргийн хүн, хурандаа генерал цолтой. Эдүгээ 51 настай Алексей Дюмин урьд нь ОХУ-ын хуурам замын цэргийн штабын дарга, БХЯ-нй орлогч сайдаар ажиллаж байсан. Тэр ОХУ-ын баатар бөгөөд юуны учир энэ алдрыг хүртсэн нь тодорхойгүй ч Крымийг Орост нэгтгэхэд чухал үүрэг гүйцэтгэсэн гэх мэдээлэл бий.
Түүнийг 2017 оноос хойш Путиныг залгамжлах хамгийн магадлалтай гурван хүний нэгээр нэрлэж байгаа юм.
Эх сурвалж: ВВС болон Оbozrevatel.com
