Гандантэгчэнлин хийдээс ламхай нар бэлгийн хүчирхийлэлд өртсөн гэх асуудлаар өнөөдөр хэвлэлийн хурал зохион байгууллаа. Хурлын үеэр Монголын бурхан шашинтны шинэ төвийн тэргүүн хамба З.Санждорж байр сууриа илэрхийллээ. Тэрбээр "Булхай бол байгаа. Лам нар нь өөрсдөө шударга байя л гэж байгаа. Шашны хүний хувьд ганданг муулахгүй. Болсон үйл явдлыг нийгмээс нуугаад бүтэхгүй. Үнэн юм ярих гэхээр ингэж дарамталдаг. Ганц одоо илэрч байгаа юм биш. Хамгаалаад өнгөрөх гэж байгаа бололтой. Ингэж болохгүй, нийгэм өөр болсон. Энэ асуудлыг би олон жил ярьж яваа. Дамбадаржаад үг хэлснийх нь төлөө нэг хүүхдийг хөөгөөд явуулсан. Өөрсдийгөө өмгөөлж, бүх юмаа хамгаалаад гарч болохгүй. Энэ болдог уу, болдог. Болсоор ирсэн. Буддын шашнаа хамгаалах гэж байгаа нэрээр нурааж байна. Бүх баримтууд миний утсанд байгаа. Та нар ингэж худлаа мэдээлэл хийж болохгүй. Хүүхдийн эрхийн асуудлыг нуун дарагдуулж болохгүй. Хэвлэлийн хуралд ажиглагчаар суусан чинь цагдаагаар бариулах гэж үзэж байна" гэсэн юм.
