Засгийн газар “Шинэ сэргэлтийн бодлого”-ын хүрээнд энэ жил "Монголын Эдийн засгийн форум-2022"-ыг өргөн хүрээнд зохион байгуулахаар шийдвэрлээд байна. Энэ удаагийн форумын урьдчилсан хэлэлцүүлгийг 6 салбараар 6 удаа зохион байгуулсан. Ирэх сарын 7-8-нд болох нэгдсэн чуулганы бэлтгэл, хэлэлцэх асуудлын талаар "Эдийн засгийн форум" ТББ-ын нарийн бичгийн дарга Ч.Ганхуягаас тодруулав.
Тэрээр, “Монголын Эдийн засгийн форум” нь Төр-хувийн хэвшлийн хооронд гол яриа хэлцлийг үүсгэх, харилцан ярилцах боломжийг олгодог, эдийн засгийн талбар юм гэдгийг тодотгож байна. Хамтын ажиллагааны энэхүү платформыг 2009 онд анх байгуулжээ. Гурван жил завсарлаад болох гэж буй энэ удаагийн чуулганы онцлогын талаар тэрээр, Засгийн газраас хэрэгжүүлж эхэлж буй “Шинэ сэргэлтийн бодлого”, Монгол Улсын урт хугацааны хөгжлийн бодлогыг тодорхойлох “Алсын хараа-2050”-ын эхний 10 жилд хийх ажлууд дээр төвлөрөн яриа хэлэлцүүлэг хийнэ гэдгийг тодотгов.
Тэрээр хэлэхдээ, “Шинэ сэргэлтийн бодлого”-оор Л.Оюун-Эрдэнийн Засгийн газар хөгжлийг хязгаарласан 6 хүчин зүйлийг тодорхойлж гаргаж ирээд байна. Төр- хувийн хэвшлийн хүрээнд үүнийг тойрч ярилцья гэдэг бид нэгдсэн. Үүний өмнө, чуулганы урьдчилсан хэлэлцүүлгийн яамд, Тамгын газартайгаа хамтран хийж өрнүүлье гэсэн санаачилгыг Ерөнхий сайд өөрөө гаргасан. Урьдчилсан хэлэлцүүлгүүд Эдийн засгийн чуулганы үндсэн форум болохоос өмнө, 6 бүтэн өдөр үргэлжилж байгаа нь онцлоготой юм.
Д.Ганхуяг: Эдийн засгийн өсөлтөөс гадна тулгараад буй нөхцөл байдалд хэрхэн ажиллах талаар хэлэлцэнэ.
“Шинэ сэргэлтийн бодлого” нь өөрөө ковидын цар тахлын нөхцөл байдал дуусч байгаатай холбоотойгоор, “Рио Тинто” групптэй олон жил үл ойлголцсон байдал арилж ирсэн, ийм үетэй давхцаж байна. Тиймээс цаашид эдийн засаг тогтвортой хөгжих боломжтой болж, эдийн засгийн өсөлтийг хангах талаар чуулганы яриа хэлцүүлэг өрнөх болов уу гэтэл ОХУ-Украины хямралт нөхцөл байдал биднийг бас шинэ нөхцөл байдалд оруулж байна. Тодруулж хэлбэл, бид эдийн засагт өндөр өсөлтийг бий болгох талаар ярьж байсан бол одоо бид бий болсон зүйлээ, байгаа эдийн засгаа яаж хамгаалж авч үлдэх гэсэн байдалд хүрч байна. Тиймээс эдийн засагч нар энэ талаар дэлгэрэнгүй ярилцах болов уу. Хаалттай хэлэлцүүлэг ч болох байх.
Үндсэн чуулган дээр эдийн засгийн хөгжлийг боож байгаа, өсөлтийг хаагаад байгаа гол хүчин зүйлүүдийг түлхүү ярилцана. Эдийн засгийн цаашдын хөгжил боомтын сэргэлт, төрийн бүтээмжийг дээшлүүлэх “Ногоон хөгжил”, аялал жуулчлал гэсэн 6 хязгаарлагч хүчин зүйлээр тодорхойлогдож байна. “Эрчим хүчний сэргэлт” хэлэлцүүлэг дээр Эрчим хүчний сайд Н.Тавинбэх, “Бид цахилгаан эрчим хүчээ хязгаарлахаас өөр аргагүй болно. Тэлэх боломж байхгүй” гэж бодит байдлыг хэлсэн. Өнөөдөр Орос-Украины дайнаас болж бидэнд ямар нөхцөл байдал үүсч байна гэхээр банк, санхүүгийн төлбөр тооцоо, ОХУ-аас оруулж ирж буй нефтийн бүтээгдэхүүн, шатахууны нийлүүлэлт дээр томоохон эрсдэл сорилтыг бий болгож, ийм нөхцөлд бид яаж зохицож ажиллах юм гэдэг нь чухал асуудал болж хувираад байна.
Украин улс наранцэцгийн тосны дэлхийн хэрэглээний 50 хувийг нийлүүлдэг орон. Манай улс Украин, ОХУ-аас үр тариагаа авдаг байсан бол энэ бүхэн хаагдчихлаа. Тиймээс бидэнд хүнсний аюулгүй байдлаа хангах үүднээс хэрхэн, яаж ажиллах гэсэн асуудал гарч ирж байна. Энэ дээр жишээ нь, бид эрсдлийн удирдлагын зохистой арга хэмжээг авах талаар ярилцахаас өөр аргагүй байдал хүрч байна. Тиймээс энэ бүх асуудлыг “Монголын Эдийн засгийн чуулган-2022” форум дээр түлхүү ярилцах байх гэв.
