Соёлын яам, Хөдөлмөр нийгмийн хамгааллын яам, Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газар, Хөдөлмөр халамжийн үйлчилгээний ерөнхий газар, Боловсролын ерөнхий газар, Монголын залуучуудын холбоо хамтран “Шинэ түүх - New story” өсвөр үе, залуусыг хөгжүүлэх хөтөлбөрийг 21 аймагт хэрэгжүүлэн ажиллалаа.
Монгол Улсын Соёлын сайдын тушаалаар 2021 оны 05 дугаар сард Соёлын яамны Залуучуудын хөгжлийн зөвлөл байгуулагдсан. Энэ хүрээнд яамны Залуучуудын Хөгжлийн Зөвлөл нь салбарын залуучуудын хөгжил, оролцоо, манлайллыг нэмэгдүүлэх чиглэлээр дэргэдээ Соёл, урлагийн 14 төрөл, чиглэлээр болон харьяа 10 байгууллагад салбар зөвлөлөө байгуулан тэдний хөгжлийг дэмжсэн олон талт нөлөөллийн үйл ажиллагааг зохион байгуулан ажилласан.
“Шинэ түүх - New story” хөтөлбөрийн хүрээнд 05 дугаар сарын 09-13-ны өдрүүдэд Дархан, Сэлэнгэ, Орхон, Булган аймагт соёлын салбарын залуучуудын хөгжлийн зөвлөлийг байгуулан, батламжийг гардууллаа. Дархан аймгийн соёлын салбарын залуучуудын хөгжлийн зөвлөлийн даргаар Соёл, урлаг хариуцсан мэргэжилтэн Ц.Отгонбаяр, Сэлэнгэ аймгийн соёлын салбарын залуучуудын хөгжлийн зөвлөлийн даргаар Сэлэнгийн долгио чуулгын бүжигчин Ч.Энхтуул, Орхон аймгийн соёлын салбарын залуучуудын хөгжлийн зөвлөлийн даргаар Орхон аймгийн Номын төвийн номын санч Ч.Эрдэнсувд, Булган аймгийн соёлын салбарын залуучуудын хөгжлийн зөвлөлийн даргаар Соёл, урлагийн газрын соёлын өвийн асуудал хариуцсан мэргэжилтэн Г.Энхболд нар сонгогдлоо.
