Ангарскийн үйлдвэрт зуны засварын ажлыг уламжлал ёсоор гүйцэтгэнэ. Энэ жил засварын ажил өмнөх жилүүдээс урт хугацаанд буюу 30 хоног үргэлжлэх талаар үйлдвэрийн зүгээс урьдчилан мэдээлжээ. Энэ нь өмнө нь 15 хоногт засварладаг шатахуун нийлүүлэгч компанийн үйлдвэрлэл энэ хугацаанд түр зогсоно гэсэн үг. Засварын ажил Монголчуудын хөдөө орон нутаг илүү зорчдог зуны хугацаанд давхцаж байна. УУХҮ-ийн яамнаас шаардлагатай нөөц бүрдүүлэхээр хамтран ажиллаж байгаа хэмээн мэдээллээд байсан.
Энэ талаар Сангийн сайд Б.Жавхлан "Ангарскийн Роснефтийн үйлдвэрт зуны засварын ажлыг хийх гэж байгаатай холбогдуулан тээвэрлэлт түр хугацаагаар зогсох асуудал байгааг Оросын талаас мэдэгдсэн. Гэхдээ бидэнд тодорхой хэмжээний нөөц байгаа. Засварын хугацаа болоод засвар эхлэхээс өмнө хэдий хэмжээгээр нөөцөлж чадах вэ, өөр эх үүсвэрүүдээс Монголын тал руу нийлүүлэх гээд гарцуудыг ярьж байна. Засварын үеэр шатахууны хангалт бүрэн зогсоно гэдэг эрсдэл гарахгүй." гэлээ.
