дэмжих тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэх асуудлыг хэлэлцэж байна.
Хэлэлцэж буй асуудалтай холбогдуулан УИХ-ын гишүүд үг хэлж, асуултад хариулт авч байна.
УИХ-ын гишүүн Ч.Ундрам: "Энэ хуульд оруулж ирсэн зарим дэмжлэгийг оновчтой эсэхэд эргэлзэж байна. Энэ хуулийг хэлэлцэх батлахад төрөөс ямар нэгэн зардал гарахгүй гэсэн. Гэтэл хуулиа уншаад 2-р бүлэг багтсан төрөөс дэмжих дэмжлэгүүд гэснийг гайхаад байх юм. 8.3-т хүмүүст талон олгоно гэж байна. Соёлын бүтээлч үйлдвэрлэлийн бараа худалдаж авахад зориулаад талон олгоно гэсэн байна. Нүд орой дээр гарахаар гайхамшигтай, ойлгогдохооргүй заалт вэ. Халамжийн системд Соёлын бүтээлч үйлдвэрлэлээ нэгтгэх гээд байгаа юм уу.
Соёлын салбарт мэргэжилтэн, хүний нөөц бэлтгэхэд зориулагдах мөнгийг Засгийн газар гаргана л гэнэ. Мөн соёлын чиглэлээр үйл ажиллагаа явуулж буй компаниудад өрийн баталгаа гаргаж өгөх юм байна. Энэ чинь одоо юу гэсэн үг юм бэ. Би ерөөсөө ойлгохгүй байна. Үүн дээр Сангийн яамнаас ямар санал өгсөн юм бол. Гайхаад байх юм.
Дээр нь нэмээд соёлын бүтээлч үйлдвэрлэлийн парк, цогцолбор байгуулж өгнө гэнээ, төрөөс. Тэмцээнд уралдаан зохион байгуулахад хүртэл төр мөнгө гаргах нь. Татвар төлөгчдийн мөнгийг зарцуулах нь хэр оновчтой юм бэ. Улсаас мөнгө гаргахгүй гээд байгаа дүгнэлт чинь худал байна.
Гаалийн татвар сэлтээс чөлөөлж болно. Гэхдээ дахиад сан байгуулна гэж байна. Сангууд хулгайд автаад хэл ам гараад байна. Сангийн менежмент Монголд явахгүй гэдэг нь харагдчихсан. Таны саналаар Кино урлагийг дэмжих сан байгуулагдсан. Үйл ажиллагаагаа явуулж байна. Одоо дахиад соёлыг дэмжих сан байгуулбал хэр үр дүнтэй байх юм бол" хэмээн асуулаа.
УИХ-ын дэд дарга Л.Мөнхбаатар "Соёлын бүтээлч үйлдвэрлэлийг дэмжих тухай хуульд өгсөн Сангийн яам болон Эдийн засаг, хөгжлийн яамны саналуудыг танилуулах нь зүйтэй" хэмээлээ.
Соёлын сайд Ч.Номин "Аливаа бизнес, шинэ салбарыг хөгжүүлэх нөхцөлд тодорхой үе шат байдаг. Бойжуулна, хөгжүүлнэ, түгээн дэлгэрүүлнэ гэсэн үе шатууд бий. Энэ утгаараа энэ хууль шинэ эдийн засгийг бойжуулах гэж оруулж ирж байгаа гэж та ойлгож болно. Соёлын бүтээлч үйлдвэрлэлийнхээ дэд системийн уялдаа холбоог бүрэн хангаж, аль хэсэгт зөв дэмжлэг үзүүлбэл эдийн засгийн хувьд бойжих боломжтой вэ гэдэг судалгаа хийгдсэн.
Таны асууж буй соёлын ваучер бол дэлхийн соёлын салбарт гарч байгаа хамгийн том чиг хандлага. Энэ бол ирээдүйд соёл хүртэж сурсан иргэдийг бэлтгэх гэж буй заалт. Анх Европын улс орнуудаас үүсэн бий болсон. НҮБ-ын судалгаагаар 2020 онд өсвөр насныхан соёлын арга хэмжээнд хамгийн бага оролцож байна гэсэн дүн гарсан.
Иймд бид өсвөр буюу 14-16 насныханд аливаа соёлын арга хэмжээнд оролцох боломжтой эрхийн бичгүүдийг бий олгох заалтыг оруулж ирсэн" хэмээн хариуллаа.
Соёлын бүтээлч үйлдвэрлэлийг дэмжих тухай хуулийн төслийг хэлэлцэхийг гишүүдийн олонх дэмжсэн тул анхны хэлэлцүүлэгт бэлтгүүлэхээр холбогдох байнгын хороонд шилжүүллээ.
