Украин улс орондоо үйлдвэр байгуулахаар барууны зэвсгийн компаниудтай хэлэлцээр хийж байна гэж Стратегийн аж үйлдвэрийн дэд сайд Сергей Боев Ройтерс агентлагт ярьжээ.
Үүнийгээ тэрбээр тодруулж, энэ нь Герман, Итали, Франц, Зүүн Европын үйлдвэрлэгчдийн тухай ярьж байна гэжээ. Украины дэд сайд "Бид ойрын хэдэн сард багтаж гэрээ хэлэлцээрт гарын үсэг зурна гэдэгт итгэлтэй байна" гэжээ..
Түүний хэлснээр, Украинд гадаадын зэвсгийн компаниудыг татан оролцуулснаар Киев өөрийн хэрэгцээг илүү үр дүнтэй хангахын зэрэгцээ дэлхийн хэрэглэгчдэд чиглэсэн батлан хамгаалах үйлдвэрлэлээ хөгжүүлэх боломжтой болно. Үүнээс гадна украинчуудад ажлын байр бий болгоно.
Цаашид түрэмгийллийг дарахын тулд Украинд батлан хамгаалах хүчирхэг үйлдвэр, хүчирхэг зэвсэгт хүчин шаардлагатай. Тийм ч учраас олон улсын түншүүд ирж, үйлдвэрүүд байгуулж, үүний үр дүнд улс орноо чөлөөт ертөнцийн аюулгүй байдлын тогтолцоонд оруулах нь маш чухал гэж бид үзэж байна гэж Боев онцолсон байна.
Дэд сайд Парисын агаарын шоуны хүрээнд мөн дрон үйлдвэрлэгчидтэй холбоо тогтоожээ. Бид янз бүрийн түвшний хамтын ажиллагааны талаар ярилцсан. Мөн зарим компаниуд ирж, хөрөнгө оруулалт хийж, нисгэгчгүй онгоц үйлдвэрлэхэд бэлэн байна гэж хэлсэн” гэж Боев хэлсэн ч ямар компанийн тухай ярьж байгаагаа хэлэхээс татгалзсан байна.
Өнгөрсөн оны сүүлээр Туркийн "Baykar" Украинд үйлдвэрээ хоёр жилийн дотор барьж дуусгахаар төлөвлөж байгаагаа мэдэгдсэн. Энэ талаар Оросууд Украин руу довтлохоос өмнө ч холбогдох тохиролцоонд хүрсэн байсан гэжээ.
Өнгөрсөн тавдугаар сард Украины Ерөнхийлөгч Владимир Зеленский Британийн батлан хамгаалахын "BAE Systems" компанитай танк, их буу хүртэл зэвсэг үйлдвэрлэх, засварлах Украины бааз байгуулахаар ажиллаж байна гэж мэдэгдсэн боловч эх сурвалжийн мэдээлснээр энэ гэрээнд гарын үсэг зураагүй байна.
Өнгөрсөн сард Германы “Rheinmetall” компани Украины төрийн өмчит “Укроборонпром” конгломераттай хамтран тус улсад танк үйлдвэрлэж, засварлах үйлдвэр байгуулсан юм.
"Rheinmetall" компанийн гүйцэтгэх захирал Армин Паппергер “Машин /танк/ галд өртдөг, эвдэрдэг, үүнийг засах шаардлагатай. Бид Украинд танкныхаа засвар үйлчилгээг хийж, сэлбэг хэрэгслийг өөрсдөө үйлдвэрлэхэд нь туслахыг хичээж байна" гэж хэлж байв.
Энэ мэдээллийн дараа ОХУ-ын Аюулгүйн зөвлөлийн орлогч дарга Дмитрий Медведев Германы компани Украинд байгуулах үйлдвэрийг Орос устгана гэж мэдэгдэв. "Тэсэн ядан хүлээж байна. Энэ үйл явдлыг Калибр болон бусад пиротехникийн хэрэгслийн мэндчилгээгээр зохих ёсоор тэмдэглэнэ" гэж тэр бичиж байв.
Эх сурвалж: Мoscowtimes.ru
