АНУ-ын Төрийн нарийн бичгийн дарга Энтони Блинкен Хятадад эвлэрэх айлчлал хийснээс хойш ердөө нэг хоногийн дараа АНУ-ын Ерөнхийлөгч Жо Байден БНХАУ-ын дарга Ши Жиньпинийг дарангуйлагч гэж нэрлэжээ. Харин Бээжин үүнд хараахан хариу өгөөгүй байна.
Жо Байден энэ оны эхээр Хятадын тагнуулын бөмбөлөгийг унагахад Ши Жиньпин ямар хариу үйлдэл үзүүлсэн талаар ярихдаа Ши Жиньпинийг "дарангуйлагч" гэж нэрлэжээ.
Байден Калифорнид үг хэлэхдээ, Ши Жиньпин энэ тагнуулын бөмбөлөгийн эргэн тойронд дуулиан дэгдээж байгаад сэтгэл дундуур байсан гэв.
"Дотроо тагнуулын хоёр төхөөрөмжтэй тэр бөмбөлгийг харваж унагахад Ши Жиньпин маш их сэтгэл дундуур байсан шалтгаан нь тэр энэ бөмбөлгийн талаар мэдэхгүй байсан явдал. Юу болж өнгөрснийг мэдээгүй байсан нь дарангуйлагчид үнэхээр таалагдаагүй" гэж Байден хэлсэн үгэндээ дурджээ.
АНУ-ын Төрийн нарийн бичгийн дарга Энтони Блинкен ням, даваа гарагт Бээжинд айлчилсан. Түүний айлчлалын зорилго нь сүүлийн саруудад мэдэгдэхүйц хурцадсан Хятад, АНУ-ын хоорондын хурцадмал байдлыг намжаах явдал байв.
Блинкен даваа гарагт Ши Жиньпинтэй уулзсан. Ши Жиньпин уулзалтын үеэр тодорхой ахиц дэвшил гарсан гэж хэлсэн бол Блинкен хоёр тал яриа хэлэлцээгээ үргэлжлүүлэхэд бэлэн байгааг илтгэсэн. Үүний зэрэгцээ Бээжин, Вашингтоны хооронд ноцтой санал зөрөлдөөн байсаар байгааг Төрийн нарийн бичгийн дарга бас дурдсан.
Эдгээр санал зөрөлдөөн нь худалдааны бодлого, Хятадын хүчээр булаан авна гэж заналхийлж буй Тайванийн хувь заяа, БНХАУ-ын хүний эрхийн асуудалтай холбоотой юм.
Энэ нь АНУ-ын гадаад бодлогын тэргүүний сүүлийн таван жилд Хятадад хийсэн анхны айлчлал байлаа.
Эх сурвалж: ВВС
