Энэтхэгийн хойд хэсэгт орших Уттар Прадеш мужийн Баллиа дүүрэгт Пүрэв гарагаас Ням гарагийн хооронд 68 хүн нас бараад байна.
Хэт халалтын улмаас үүдэлтэй энэхүү нас баралтын тоо улам нэмэгдэж байгаад албаныхан санаа зовниж байна.
Энэтхэгийн хойд болон зүүн хэсэгт энэ долоо хоногт агаарын температур 46 хэмд хүрсэн тухай AFP мэдээлэв. Тус улсад зуны 5, 6-р саруудад ихэвчлэн халдаг ч уур амьсгалын өөрчлөлт нь түүхэнд байгаагүй халуун болоход нөлөөлжээ.
Гэвч орон нутгийн албаны хүмүүс үхлээс урьдчилан сэргийлэхийн тулд засгийн газрыг хангалттай арга хэмжээ аваагүй гэж буруутгаж байгаа аж. Мөн сөрөг хүчний улс төрийн намын дарга, Уттар Прадеш мужийн ерөнхий сайд асан Ахилеш Ядав олон тооны хүн нас барсан гэж засгийн газрыг шүүмжилжээ.
Тэрбээр "Мужийн засгийн газрын хайхрамжгүй байдлаас болж муж даяар маш олон хүн амь насаа алдлаа. Тэд халууны талаар ард түмэнд сэрэмжлүүлэх ёстой байсан. Сүүлийн зургаан жилд нэг ч дүүргийн эмнэлэг баригдаагүй. Амь насаа алдсан хүмүүс хоол хүнс, эм тариа, эмчилгээгээ цаг тухайд нь авч чадаагүй ядуу тариаланчид байжээ” гэв.
BBC-ийн мэдээлснээр өвчтөнүүдийн дийлэнх нь 60-аас дээш настай, хууч өвчтэй байсан. Халуун цаг агаарын үед тэдний өвчин хүндэрч, эмнэлэгт хүргэгдэн эмчилгээ хийлгэсэн ч нас барсан байна.
Уур амьсгалын өөрчлөлтийн асуудлаарх Засгийн газар хоорондын комиссын мэдээлснээр Энэтхэг нь уур амьсгалын хямралын нөлөөнд хамгийн их өртөх орнуудын тоонд багтдаг. Сүүлийн жилүүдэд Засгийн газар хэт халалтын нөлөөг бууруулахын тулд сургуулиудыг хааж, олон нийтэд эрүүл мэндийн зөвлөгөө өгөх зэрэг арга хэмжээг тогтмол авчээ.
Эх сурвалж: CNN
