Өмнөд солонгосын тамирчин Сон Хён Мин-д Саудын Арабын клубээс урилга ирсэн. Тэгвэл тэрбээр мягмар гарагт тус багт тоглох сонирхолгүй байгаагаа мэдэгджээ.
“Надад одоогоор мөнгө чухал биш. Би өөрөө тоглох дуртай лигтээ тоглохыг хүсэж байна. Надад Премьер лигт хийж бүтээхийг хүссэн олон зүйл байна. Тиймээс дараагийн улиралдаа бэлдэх болно” хэмээн ярьжээ.
Хэвлэл мэдээллээр Аль-Иттихад клубээс түүнд 65 сая ам.долларын цалинтай урт хугацааны гэрээ хийх санал тавьсан тухай мэдээлсэн.
Түүний хувьд Английн Тоттенхэм клубт 2015 оноос хойш тоглож байгаа. 2021-22 оны улиралд Премьер лигийн “Алтан шаахай” шагналыг хүртсэн анхны Ази тамирчин болсон юм.
Тэрбээр өнгөрсөн сард ивэрхийн хагалгаанд орж, Солонгосын шигшээ баг Перутай хийсэн тоглолтод өнжсөн юм.
Эх сурвалж: Yonhap
