Financial Times сонины орон нутгийн цагаар 15-ны өдөр мэдээлснээр, барууны орнуудын хориг арга хэмжээний хариуд ОХУ тус улс дахь Америк, Европын компаниудын хөрөнгийг хурааж, улсын өмч болгох талаар хэлэлцэж байгаа тухай онцолжээ.
Тус мэдээнд дурдсанаар ОХУ-ын ерөнхийлөгч Владимир Путин уг хуулийн төслийг өнгөрсөн долоо хоногт нууцаар санал оруулсан болохыг дурдав. Уг хуулийн төсөлд зааснаар ОХУ барууны компаниудын хөрөнгийг эхлээд хямд үнээр худалдан авч, дараа нь ашиг шингээн зарах боломжтой талаар тусгажээ.
Түүнчлэн эдгээр хөрөнгийг худалдан авах эрх нь зөвхөн оросуудад л байх заалтыг тусгаснаараа барууны компаниудын тус улсын зах зээлийг орхих замыг хязгаарлаж буй явдал болж буй аж.
Кремлийн хэвлэлийн төлөөлөгч Дмитрий Песков “Бид барууны хөрөнгө оруулагчид болон компаниудыг Оросын зах зээлийг сонгож, хөрөнгө оруулалт хийхэд туйлын эерэгээр хүлээж авч байгаа хэдий ч үүрэг хариуцлагаа биелүүлдэггүй компаниудтай “салах ёс гүйцэтгэх” болно” хэмээн мэдэгджээ. Харин дараа нь “Тэдний хөрөнгийг хэрхэх эсэх нь бидний дур” хэмээн анхааруулав.
ОХУ-аас ийнхүү хуулиа чангатгаж байгаатай холбоотойгоор тус улсын зах зээлийг орхиж буй барууны нэгэн компанийн захирал хэлэхдээ “Орос дахь хөрөнгө маань ирээдүйд тус улсын мэдэлд очих эсэх нь цаг хугацааны л асуудал. ОХУ-д одоо мөнгөнөөс хэрэгтэй зүйл байхгүй” хэмээн цохон тэмдэглэсэн байна.
Тус улсын энэ оны төсвийн алдагдал 42 тэрбум ам.долларт хүрээд байгаа энэ үед орлогын шинэ эх үүсвэр болгон уг хуулийн төслийг санаачилсан байх магадлал өндөр байна хэмээн Financial Times сонин дүгнэжээ.
Үүнтэй холбоотойгоор ОХУ-ын Сангийн яамны зүгээс барууны компаниудын тус улсын зах зээлийг орхих үйл явц “хэвийн үргэлжилж байгаа” гэж мэдэгдсэн ч ямар нэгэн нэмэлт тайлбар хийлгүйгээр “цаашид хувь хүний гүйлгээнд өөрчлөлт оруулах боломж бий” хэмээн мэдэгдэв.
Үүний зэрэгцээ өнгөрсөн оны арванхоёрдугаар сараас эхлэн барууны компаниуд Орос дахь хөрөнгөө захиран зарцуулахдаа оросуудад 50-иас доошгүй хувийн хөнгөлөлт үзүүлэх, борлуулалтын үнийн дүнгийн 5-10 хувийг хандивлах зэрэг шийдвэрүүдийг гаргасан билээ.
Эх сурвалж: JoongAng
