Манай улсад импортоор орж ирж буй барилгын материалууд тэр дундаа савласан бүтээгдэхүүн болох цемент, замаск, эмульс, будаг зэрэг нь хаяг шошго дээр тэмдэглэсэн жин хэмжээндээ хүрдэггүй. Мөн дутуу савлагаатай байх зөрчил ихээр гарч хэрэглэгчдийг хохироох нөхцөл байдал үүсгэж байгаа. Тиймээс Стандарт, хэмжил зүйн газар энэ онд савласан бүтээгдэхүүний жин хэмжээнд төлөвлөгөөт бус урьдчилан сэргийлэх шалгалтыг үе шаттайгаар хийхээр болжээ. Тус шалгалтын үйл ажиллагаанд Шударга өрсөлдөөн, хэрэглэгчийн төлөө газар хамтран оролцох юм.
