Төв аймаг улаанбуудай, төмс, хүнсний ногооны үйлдвэрлэлээр нийслэлийн хүн амын хүнсний хангамжийг бүрдүүлэхэд томоохон үүрэг гүйцэтгэдэг. Тус аймгийн ургац тариалалтын талаар тодруулахаар Засаг дарга Д.Мөнхбаатартай холбогдлоо.
-Д.Мөнхбаатар: Газар тариалалтын ажил 70 хувьтай байна. Малын таримал тэжээлийн ажил үлдсэн-
Тэрбээр, “Энэ жил газар тариалалтын ажил долоо хоногоор хоцорч эхэлсэн билээ. Яагаад гэвэл хөрсний чийг хангалттай хэмжээнд байгаагүй юм.
Одоогоор газар тариалалтын ажил 70 хувьтай үргэлжилж байна. Малын таримал тэжээлээс бусад тариалалтын ажил дууссан гэсэн үг. Манай аймаг улаанбуудай, хүнсний ногоо, тосны ургамал зэргийг тариалдаг. Энэ жил 130 га газар тариалалт явуулж 350 мянган тн ургац авах төлөвлөгөө гарган ажиллаж байна.
Газар тариалалтын ажилд зоорь болон техникийн хэрэгцээ чухал байдаг. Гэтэл бидэнд дээрх нөөц дутмаг байгаагаас үүдэж тариаланч, малчид, компаниуд, иргэдээ хоршоолол болгож нэгдэж, хамтарч ажиллах стратеги төлөвлөгөө гаргаж ажиллаж байна.
Нийт ургацынхаа 50-60 орчмыг л зооринд хадгалж чаддаг. Үлдсэн хэсгийг нь хямд үнээр, их хэмжээгээр борлуулдаг. Хэрэв зоорь хүрэлцээтэй бол хадгалж байгаад боломжийн үнээр борлуулах боломжтой.
Үүнээс гадна бороо хур их хэмжээгээр орсон жилүүдэд ургац тариалалтад хохирол учирдаг. Байгалийн давагдашгүй хүчин зүйлийн өмнө бид яах аргагүй хүчин мөхөстдөг юм” хэмээв.
-Б.Сарантуяа: Эрдэнэсант суманд 428 бог мал үерт урсаж, 760 га талбай сэргэх боломжгүй болсон-
Энэ сарын 13-ны өдрийн 17.00-18.00 цагийн орчимд Төв аймгийн Эрдэнэсант суманд хүчтэй бороо, мөндөр орсны улмаас хохирол үүссэн аж. Эл асуудалтай холбоотойгоор тус сумын ЗДТГ-ийн дарга Б.Сарантуяатай холбогдлоо.
Тэрбээр, “Манай сум газар тариалалтын хэмжээгээр аймагтаа хоёрдугаарт эрэмбэлэгддэг. Нийт 24.3 мянган га талбайд ургац тариалсан. Үүнээс 760 га талбайн ургацыг алдлаа. Энэ сарын 13-ны өдөр бороо болон мөндөр орсон юм. Улмаар дараах хохирол үүсээд байна.
- Хоёр айлын 428 бог мал үерт урсаж хорогдсон
- Хоёр малчин өрхийн гэр нурж, эвдэрсэн
- Улаанбаатараас Өвөрхангай аймгийн чиглэлийн авто замын 192-195 км хэсэгт үерлэж, түр хөдөлгөөн саатсан
- Шатахуун ачиж явсан том оврын авто машины толгой хэсэг салж улмаар замын хажуугаар урсаж осолдсон
- Нэг автобус замын хажуугаар усанд урсаж орсон
- Сумын төвд дөрвөн айлын хашаа нурсан
- Газар тариалангийн дөрвөн аж ахуй нэгжийн улаанбуудай тариалсан 1060 га талбайд үер бууж, мөндөрт өртсөн. Улмаар 760 орчим га талбай сэргэх боломжгүй гэсэн дүгнэлтийг ажлын хэсэг гаргалаа.
Дээрх гамшгийн үед хүний амь нас, эрүүл мэнд хохироогүй бөгөөд шаардлагатай тусламж үйлчилгээг үзүүлж ажилласан. Сэргэх боломжгүй талбайд энэ жилдээ дахин ургац тариалахгүй. 760 га талбайгаас найм орчин тонн ургац авах байсныг алдлаа” хэмээв.
