Майкрософт корпорацын үүсгэн байгуулагч Билл Гейтс БНХАУ-д айлчилж байгаа бөгөөд өнөөдөр БНХАУ-ын дарга Ши Жиньпинтэй уулзсан байна. Энэхүү уулзалт нь Ши Жиньпиний сүүлийн жилүүдэд гадаадын хувийн бизнес эрхлэгчтэй хийсэн анхны уулзалт болж байна. Ши Жиньпин Гейтст хандан "Та энэ жил Бээжинд миний уулзсан анхны америк холбоотон" гэж хэлсэн байна. Тэрээр "Бид Америкийн ард түмэнд үргэлж итгэж, хоёр орны ард түмний найрамдалт үргэлжлэн хөгжинө гэдэгт итгэж байна" хэмээсэн байна.
Пүрэв гарагт Билл ба Мелинда Гейтс сан хумхаа, сүрьеэтэй тэмцэх Хятадын хүчин чармайлтыг дэмжихийн тулд 50 сая ам.доллар олгоно гэж мэдэгдсэн байна.
Билл Гейтс дэлхийн эрүүл мэнд, боловсрол, цаг уурын өөрчлөлттэй холбоотой буяны үйлсэд анхаарлаа хандуулахын тулд 2020 онд Майкрософт компанийн удирдах зөвлөл дэх албан тушаалаасаа буусан. Үүнээс ч өмнө буюу 2008 онд Майкрософт компанийн гүйцэтгэх албан тушаалаа орхисон.
Ши Жиньпин, Гейтс нар хамгийн сүүлд 2015 онд Хайнань мужид болсон Боаогийн форумын үеэр уулзаж байжээ. 2020 оны эхээр Ши Жиньпин Гейтс болон Билл ба Мелинда Гейтс сан Хятадад COVID-19-ийн эсрэг тэмцэхэд таван сая ам.долларын тусламж үзүүлсэнд талархсан захидал бичиж байжээ. Энэ оны эхээр Хятад улс хилээ бүрэн нээснээс хойш хэд хэдэн гадаадын компанийн гүйцэтгэх захирал тус улсад айлчилсан боловч олонх нь Засгийн газрын сайд нартай уулзсан байна.
Ерөнхий сайд Ли Цян гуравдугаар сард “Apple”-ын Тим Күүк зэрэг гадаадын гүйцэтгэх захирлуудтай уулзсан бол Теслагийн Элон Маск Ерөнхий сайдын орлогч Дин Сюексянтай уулзсан байна. Гейтсийн айлчлал нь АНУ-ын Төрийн нарийн бичгийн дарга Антони Блинкений энэ сарын 18-19-нд Хятадад хийх удтал хойшлогдсон айлчлалын өмнө болж байгаа бөгөөд энэ нь дэлхийн хамгийн том эдийн засагтай, стратегийн өрсөлдөгчдийн хоорондын харилцааг тогтворжуулах зорилготой юм. Блинкен лхагва гарагт Хятадын Гадаад хэргийн сайд Цин Гантай ширүүн яриа өрнүүлсэн бөгөөд энэ үеэр Цинь АНУ-ыг БНХАУ-ын хэрэгт хөндлөнгөөс оролцож, аюулгүй байдалд нь хохирол учруулахаа зогсоохыг уриалсан.
