ҮСХ-ноос сар бүр Монгол Улсын нийгэм, эдийн засгийн байдлыг танилцуулдаг билээ. Тэгвэл 2023 оны эхний 5 сарын голлох үзүүлэлтүүдийг өнөөдөр танилцуулж байна.
Нийгмийн салбарын үзүүлэлтүүдийг Бодлого, хамтын ажиллагааны газрын ахлах статистикч С.Норов мэдээлэл өглөө. Тэрбээр "Нийгмийн даатгалын сангийн орлого энэ оны эхний таван сарын байдлаар 1.5 их наяд төгрөг болж, өмнөх оны мөн үеэс 241.6 тэрбум төгрөгөөр өссөн. Уг өсөлтөд тэтгэврийн даатгалын сангийн орлого 16.7 хувь, үйлдвэрлэлийн осол мэргэжлээс шалтгаалах өвчний даатгалын сангийн орлого 36.2 хувиар өссөн нь голлон нөлөөлсөн. Харин Нийгмийн даатгалын сан энэ оны эхний таван сард 1.5 их наяд төгрөгийн зарлагатай байгаа нь өмнөх оны мөн үеэс 177.3 тэрбум төгрөг буюу 13.3 хувиар өссөн байна. Уг өсөлтөд Ажилгүйдлын даатгалын зарлага өмнөх оны мөн үеэс 14.9 тэрбум төгрөг буюу 53.6 хувь, Тэтгэмжийн даатгалын сангийн зардал 23.3 тэрбум төгрөг буюу 37.2 хувиар өссөн нь нөлөөлжээ.
Нийгмийн даатгалын сангаас тэтгэвэр авагчдын тоо энэ оны тавдугаар сард 487 мянга болж өмнөх оны мөн үеэс 16.8 мянган хүнээр нэмэгджээ.
Нийгмийн халамжийн сан энэ оны тавдугаар сард давхардсан тоогоор 2.2 сая хүнд 800,5 тэрбум төгрөгийн тэтгэвэр тэтгэмж, тусламж үйлчилгээ хөнгөлөлтийг олгосон байна. Энэ нь өмнөх оны мөн үеэс Ниймгийн халамжийн үйлчилгээнд хамрагдагчид 40.4 мянгаар, олгосон тэтгэвэр, тэтгэмж, тусламж үйлчилгээ хөнгөлөлтийн хэмжээ 39.1 тэрбум төгрөг буюу 4.7 хувиар тус тус буурсан байна. Уг бууралтад хүүхдийн мөнгөн тэтгэмжид хамрагдсан хүүхдийн тоо өмнөх оны мөн үеэс 93.1 мянга буюу 7.4 хувиар, олгосон мөнгөн тэтгэмж 42 тэрбум төгрөг буюу 6.8 хувиар буурсан нь голлон нөлөөлжээ. Нийгмийн халамжийн тэтгэвэрт эхний таван сард 56.4 мянган хүн хамрагдсан нь өмнөх онтой харьцуулахад 2.5 хувиар буурчээ. Эдгээр иргэдийн 62.2 хувь нь хөгжлийн бэрхшээлтэй иргэн, 27.2 хувь нь тэжээгч нь нас барсан 18 хүртэлх насны хүүхэд, 10.6 хувь нь ахмад настан, О.2 хувь нь 16 насанд хүрсэн одой иргэн байна.
Ажиллагчдын сарын голч буюу медиан цалин 1 сая 352 мянган төгрөг байна. Голч цалин өмнөх улирлаас 5.3 хувиар нэмэгдсэн байна. Ажиллагсдын сарын цалинг эдийн засгийн бүх төрлийн салбарын ангиллаар авч үзвэл, олон улсын байгууллага, суурин төлөөлөгчийн үйл ажиллагааны салбарт ажиллагсдын цалин хамгийн өндөр буюу 5.6 сая төгрөг, харин урлаг, үзвэр, тоглоом наадмын салбарынх хамгийн бага буюу 1.1 сая төгрөг байна.
